Pasian Innpi Ka Lungtang

Pasian innpi ka lungtang cih thulu tawh Pawlpi thu leh Zomite ngeina tawmkhat ih ki kup dingin kong teelkhia hi. Pasian ih cih pen na khempeuh a bawl Pa ahi hi. Lai Siangtho sungah "Pasian in van le lei, tuipi le tuate sunga om khempeuh a bawl, a nungta tawntung, leitung leh vannuai a uk, munkhempeuh aa a om, a vanglian mahmah ahi hi,” ci hi. Paikhiatna 20:11, Mangmugna 10:6 

Innpi cih ih et ciangin nidanglai ih pu ih paten’ a thupi mahmah aa a ngaih sut uh ih piankhiatna ih bulpi ih ki ngakna, ih ki dalna, guahzu meikai leh nisate a thuak zo ih bukna ci aa a ciepteh uh ahi hi. Gal leh Sa lauhuai a tuah uh cingin zong innpi ah ki buphual uh aa, tua innpi pen limtak in na keem uh hi. Innpi aa a om innpi ngak nu leh pa gamh a luah innpi pa innpi nu lo in bangmah thu leh la ki vaihawm ngam lo hi. Innpi ih cih ciangin neih leh laam, vanzat um leh beel a kicin deuh na mun zong ahi hi. Innpi leh a sung aa a omte zong ki zahtak mahmah in thudot pite zong na hi pah uh hi. 

Gal leh Sa pan suah taakna a ngah theihna ding, natna satna pan cidamna a ngah na ding, khua hun hoih aa, huihsia leh guahsia a om lohna ding, aan kungte a hoih theina ding cih bangin Siampi / Siampu pa tawh ki kopin a biak uh ahi dawi a lungkim sakna dingun na thoih uh hi. A biak uh dawi a lungkim sak theihna dingun gulh leh khawite it sit lo in sisan luanna tawh biakna nei in na ki thoih uh hi. Tua bang a hih uh ciangin a lungsim bek uh hilo a pumpi mahmah uh zong ki cidam na ci uh hi. Um mahmah uh ahih man in damna zong na ngah takpi uh hi.  

Tuhun ciangin a nungta tawntung Pasian ki Bia aa, Jesu si leh sa tawh Biakpiakna ki bawlin ih khanglui ngeina pawlkhat pen a theilo leh a phawk khalo mi tampi ki om hi. Khanglui ten a theih uh ahi dawi um in limpha takin bia uh ahih leh ei khangthak ten a nungta Pasian thei-in ih biak ding ki lawm zaw hilo a hi hiam? Pasian a um eite aa dingin hong ki piakhia tuuno ahi Jesu si leh sa tawh Biakpiakna pen Siampi pa tawh ki kopin aki bawl ahi hi. 

Hih Biakpiakna bawlin Topa Jesu Si leh Sa ahi Siangtho Pumpi ih san ciangin nang leh kei in Pasian omna innpi ih hi takpi hi. Kong it nu leh pa, lawm leh gual, u leh nau te aw, nang leh kei in ih upna tungtawn in Pasian Innpi ih hi aa, tua lungtang sungpan aa hongpiang upna pen gamtatna tawh a lakkhia thuzuite ih hih theina dingin thu ngen in han ciam ciat ni ci-in nang leh kei a ki hanthawn hi hang. 
Lungdam