KHA SIANGTHO PASIAN HONG KUMSUK NA PAWI NI. (May-19, 2024)

Greek kam ahi, “PENTECOST” a kici kammal in-
-Tuiciin tun khin, ni sawmnga cin ni-in, Pasian leh Noah kikal ah, nuntakna nei khempeuh tui tawh susia nawnlo ding cih kiciamna bawl ni phawkna ahi hi. (cf. Pain. 9: 12-13)
- Judah mite adingin Paisan pawi khit ni sawmnga a cin ni, Pentecost pawi ni-in, Sinai Mual tungah Pasian in Moses tungah, Thukham nam Sawm a piakna pawi, Yaweh Pasian in Israelte’ Pasian, Israelte in zong Pasian minam ahihna ciaptehna pawi a bawl ni uh ahi hi. (cf. Pai. 24: 9-15)
-Jesu Christu in asisan tawh singlamteh tungah hong bawl kiciamna, Ki-itna Thukham Thak hong piakna dingin, Pasian in hih taanglai Pentecost ni hong teel hi.
-Tonu Maria leh nungzuipite tungah Kha Siangtho hong kumsukna tawh, tua Pentecost ni pen leitungah Pawlpi suah ni ahi hi.
-Pentecost ni pen pawlpi a pian khiat nadingin Kha Siangtho in Palai hong sep ni ahi hi.
Gam sung buai na hangin, Babel tausang lamte mah bang a, lungkham liangvai a ih om laitakin, Kha Siangtho panpihna hi bangin ngen ni!
“Jordan gun sung Topa Jesu tungah khu vano banga, hong kum Kha Siangtho; Pentecost pawi ni-in, Tunnu Mary, Nungzuipite leh thu um mite’ tungah mei leii banga hong kilang Kha Siangtho aw, ko natanu/pate lungsim Eden huan sungah zong laitual hong leng inla, na om na teenna Biakinnpite hong hisak ta in. Nunna damtui ka sung uh ah hong luangsak den ta in. Kote nuntakna ah nuntakna singkung bangin hong po inla, na letsong nam sagihte hong pia in, ka nuntakna uh nangmaa thupha namkimte tawh hong gahsak ta in. Na Pumpi ahi, na Pawlpi sungah na Kha Siangtho nunna damtui Sacramentute tungtawnin hong luangsak den ta in. Nasi leh nasa-Siangtho Pumpi kasanna uh tawh na Kha Siangtho nuntakna thupha dawn khawmin, van ah na deihna a kicin mah bangin, kote nuntakna ah zong na deihna ahi, ki-it kilemna, kipumkhatna, lungnopna leh khamuanna gam hong tungsak ta in”, ci-in thu ngen ni.