Haksatna tuamtuam thuak hunin tha hongpia Misiangthote' kammal (10)

“Na thuak haksatna te a mawkna suaksak kei-in.”
(Misiangtho Pope John Paul II)
♥Ih nuntakna sungah cihmawh, haksatna ih deih loh hang, tua ih thuak gentheih, haksatna te in ih lungtang hong siangthosakin Topa Jesu tawh ih kigawm nadingin ih kha hotkhiatna ngah nading hong huh te ahi hi.
* Catechism (CCC – 1505) na sungah “Topa Jesu ii gentheih, haksatna a thuakna leh a sihna hangin Topa Jesu in ei te ii ih thuak gentheih, haksatna te hong thaksuah sak hi. Tua ih thuak gentheih, haksatna te hangin Topa Jesu tawh hong kigawm sak hi.”
1. “Lungkhamna leh gentheihna te na nuntakna sungah hong lut leh tua lungkhamdahna te Topa Jesu in it-na tawh hong napna bangin mu-in, san siam in. Tua lungkham, haksatna te hangin Topa Jesu tawh na kinai zaw aa, Topa Jesu ii it-na tawh hong nap-na na ngah ding hi.”
(Mother Theresa)
2. Topa Jesu in kei kiangah hi bangin hong gen hi. “Kong it ka tanu aw, na thuak gentheih, haksatna te hangin Pasian na lungkimsak hi. Lungsim, Pumpi gentheihna nathuak laitakin midangte tung pan hehpihna ngahnopna lungsim nei kei in. Na thuak haksatna ka siangtho sak nuam hi. Na huaihamna lungsimte paaikhia in. Haksatna, gentheihna te na it theih ciangin kei nong it na siangtho semsem ding hi.”
(Topa Jesu Siangtho Lungtang maangmuhna angah St. Faustina)
3. “Gentheih, haksatna tawh kipelh nading hanciamin ka tai laitak, Topa Jesu in gentheih, haksatna te pelh lo in athuak tentan na hong lak zelzel hi. Tua ciangin kei deihna bang hilo in Topa deihna bang hi ta hen ka ci hi. Anunung ciangin Pasian bek in lungnopna hong pia hi, Pasian tung bek ah lametna ka koih hi cih umin ka sang hi.
(Misiangtho Gemma Galgani)
4. “Thungetna tawh gentheih, haksatna te apaltan mi in leitungah minthang lo ding hi, ahi zongin vantung gamah ahoih mahmah kham lukhu angah ding hi. Gentheih, haksatna a thuak te in thupha ngah ta hen.
(Misiangtho Josemaria Escriva)
5. “Itna om lo Singlamteh leh thupit sakna lungsim neilo pi-in Singlamteh puakna in Singlamteh man hi lo hi. Ei mihingte in haksatna ih tuak ciangin ih thum ih tau thei hi. Aman takin cileng, ei te in haksatna bang mah om kei leh ih thum/tau ding hi zaw hi. Bang hang hiam cih leh haksatna (singlamteh) lampi bek in Topa Jesu tawh ei te hong kinai sak hi. Singlamteh ii thupitna leh itna hangin ih kha in Topa Jesu tawh hong kigawmsak ahih manin bangzahin hoih ding ahi hiam?”
(Misiangtho John Vianney)
6. “Gentheih, haksatnate in ih mawhna te adingin kisikkikna ih neih nading hun hoih hong pia hi. Tua bang haksatna hun ah Topa Jesu in ei te kiangah hong kumsukin ih mawhna hanga ih ngah, natna/satna te hong bawlsakin damna hong pia hi. Aman takin cileng, gentheih/haksatna te in Pasian hong piak zatuite ahi hi.”
(Misiangtho Augustine of Hippo)
7. “Cihmawh/ haksatna athuak mikhat pen thunget ahanciam loh man hi ci-in kuamahin ngaihsut ding hi lo hi. Cihmawh/haksatna athuak mi in ama thuak, haksatna te Pasian tungah ap denin tua haksatna te hangin Pasian kiangah muanna tak tawh thungen thei hi. Lungkham/sinkhamna hangin tua mi khitui luangkha leh zong tua khituite tawh thungen hi kici thei hi.”
(Misiangtho Theresa of Avila)
8. “Mailamah koi bang thusia tawh kituak ding cih ka thei kei hi. Ahi zongin Topa Jesu in ama thuciamna cikmah hunin laih lo hi cih thei-in ka um hi. Lau kei un. Haksatna na thuak uh hangin tua haksatna te na thuak zawh na dingun thakhauhna kong pia ding hi ci-in Topa Jesu in hong gen den hi. ‘Singlamteh tungah anuntakna apia khia na Topa, nang nusia takpi ta ding maw’ ci-in Topa in gen den hi.”
(Misiangtho Pio of Pietrelcina)
9. "Pasian gam tun/pai nading lampi in Topa Jesu ii Singlamteh lampi pankipan hi. Topa Jesu ii gentheih/haksatna te thuak khawmin apuakhawm mi in Topa’ gual zawhna minthanna ah ki hel kha ding hi.”
(Misiangtho Pope John Paul II)
10. “Kei mahin itna adingin haksatna ka thuak nuam hi. Itna adingin haksatna thuakna zong ka kipak/ka lungkim hi. Tua bangin itna adingin haksatna thuakna in paak khat deihna hangin lingkung te kawmah pai-in ling sut thuak aa tua paak lawhna tawh ki bang hi. Paak deih manin lingsut thuakna in a genthamlo haksatna no khat hi ziau hi.”
(Misiangtho Theresa of Avila)