All Souls Day Homily by Bishop Felix (2023)

Tuni Nov.2,2023 in Kalay Diocese hongcing hongkem His Excellency Bishop Felix Lian Khen Thang makaihna tawh Pawlpi Han, Dowinechaung, Kalaymyo ah picing tak in Missa Biakpiakna ki bawl hi.
Biakpiakna hun sungin thungetna leh lasakna, Salan La te St. Mary Cathedral Parish pan hong makaih in amaute makaih siamna hang tawh kum dang sangin thunget lasak zong nop zaw in tha kingah mah mah hi.
Han thupha piakna, Tuisianvtho thehna leh Lawbaan taihna te zong khangnote in Siampite pai na ding limtakin gelkhol uh ahih man un lem mah mah ta hi.
Khangnote in kithutuak tak in nasem khawm uh a hih manun set van zatna te a ki pan Mawtaw koihna, Cycle koih na cih te dong in a tung, a ciah cih te a mau mun ciat ah gelsa in koih in lamlak khangnote om uh a hih manun vaikhempeuh lem in thupi mahmah hi.
Siadawpa in kha-an vakna hong gen na sungah "Han pen misite omna bek hilo in Misiangtho te omna hi han mun pen mun siangtho hi" a cih mah bangin a pua lam pan zong limtak in ki puah in siangtho mahmah hi.
Thu lamdang khat ah tu kum pen Catholic te han bek hilo in Pawldang te in zong han puah ding a thupitna tawm tawm hong thei ta uh a hih manin Pawldangte han zong na kipuah in etlawm mahmah hi.
Missa Biakpiakna sungah thuzui mite pen khawlbuk sung teng dimin hong kikhawm uh a hih manin thuzui upna pen thangah huai mah mah hi.
Tu kum pen gamsung buaina tawh kisai ngaih sutna tuamtuam hang tawh Sts. Peter & Paul Parish pan Parish mintawh pai ding ki vahawm kha lo hi. A zen zen in amauteng hong kikhawm kha uh leh ih Khawlbuk sungah a ki ta nawnlo ding hi ta a hih manin maikum ciang a ding Khawlbuk beh lap ding zong kisam pha mah mah ding hi.
Tua ban ah dailenbuk zong om nailo a hih manin thupha a bawl nuam te aa dingin Khawlbuk behlap na ding leh dailenbuk lam na ding zong ki pia khia thei dingin lamen ing.
Tu ni in eite thungetsak na hangin ngimnaneu sunga om a sisa te kha tampitak in suahtakna ngah ding uh a hih manin lungdam huai mah mah hi.
Pasian hehpih na hangin a sisa te Kha khempeuh in nopsak na ngah ta hen. Amen.