Adventu paakkual leh khuaimeivak thu

Catholic biakinn te leh innkuan kimkhat te in Topa Jesu suahni ngak na hun ahi, Adventu hun sungin Paakkual bawlin tua paakkual pen mangpau in Advent Wreath kici hi. Tua paakkual ii a deihna in mongneilo in abei theilo Pasian’ itna limlahna ahi hi. Tua Paakkual pen singteh hing a englim tawh kizem hi. Tua bangin singteh eng tawh a kizepna ii a khiatna (adeihna in) Topa Jesu sungah lametna tawh nuntak na limlahna ahi hi. Tua Paakkual tungah kuaimeivak tawn li kivak in a laizangah tawn khat kikoih hi. Avekpi in tawn (5) pha aa, tua te sungpan khuaimeivak (4) te in, Christmas tun ma, nipi-ni te ah vak ding hi a, khat pen Christmas ni a vak ding ahi hi. Adventu hun sung aa, aki vak khuaimei te pen adum leh asandaang te tawh kizem hi. Adventu khuaimeivak mel a dum in ki sikkikna lim hong lak hi. A sandaang (yef;a&mif) mel in nuamna lim hong lak aa, khuaimei vak akang pen Christmas ni ciangin kivak pan hi.
Ama-sa pen khuaimei vak (mangmuhna/ lam et na khuaimei) (Hope) Ps 71:5
Ama sa khuaimei vak pen khat veivei, mangmuhna ki ci hi. Bang hang hiam cih leh Pasian kiangpan hong pai thu te, kamsangte hong gen kamciamna te hong lak hi. Tua te in Christu Topa suah nading thu genna kamciamna te ahi hi. Pawl khat te in tua khuaimeivak pen Topa Jesu sungah ih koih lam et na lim in ciamteh uh hi. Tua ahih manin tua khuaimeivak pen lam et na khuaimeivak zong ki ci hi.
A nihna khuaimei vak (It na/ Lampi khuaimei) (Love)Jn 3:15
Topa Jesu in lampi ahih na thu (Jn 14:6) na ah a nihna khuaimei vak in hong lak hi. Ei mihingte in mawhna khuamial sungah a gammang mi te ih hi hi. Topa Jesu in khuamial sung pan ei te lam honglak dingin sawlna angah khuavak ahi hi.
A thumna Khuaimei vak (Nuam na khuaimei) (Joy) Lk 1:14
A thumna khuaimei vak in hih leitungah Topa Jesu hang bek in khat bek ahi, akip lungnopna ih muh theih na ding thu hong lak hi. A dang lungnopna te in tawmvei sung bek hi a, kip lo hi.
A li-na khuaimei vak (Ki lemna khuaimei) (Peace) Lk 1:79
A li-na khuaimei vak in leitung leh mihingte lungtang sungah ki lem na hong puak ding, Topa Jesu hong kum suk na ding thu hong phawksak hi. Topa Jesu om kei leh hih leitungah ki lem na om lo ding hi.
A ngana khuaimei vak (Topa Jesu khuaimei vak / Christmas khuaimei)
Khuaimei vak a (5) na in mihingte amau mawhna pan ahonkhia dingin hong suak ahi, Topa Jesu lim hong lak hi. Tua in Topa Jesu mihing asuahna hangin aki cing ahi, kamsangte gen kholh na te atangtunna, gualzawhna pawi bawlna ahih ban ah Topa Jesu hong kum kik ciangin ei mihingte Topa tawh aki bangin tawntung nopsakna ih ngah nading ahi, anunung kicingna ih ngak lai na zong ahi hi.