Cate. John Kap tungpan Mk. 5:1-20 bulphuhin thapiakna

Catholic Nisim Lai Siangtho Hun nautaang Nipi Kaal (4) Na (MON). February 3, 2020 Lungdamna Lai Siangtho; Mark 5: 1-20 1. Amaute tuipi kantanin Gerasa gam lamah a pai uh hi. 2. Gunkuang pan Jesu a tuahkhiat ciangin, amah a dawntuah dingin kha nin a lut mi khat thahkhatin han pan hong paikhia hi. 3. Hih mipa han laka teeng hi a, kuamah in amah sikkol nangawn tawh hen zo lo hi. 4. Bang hang hiam cih leh, a khuta sikkol a kikhihnate bottatin a khe-a kolte tam veipi a sutat hi. Kuamah in amah thazawh zo lo hi. 5. Sun le zan a tawntungin han lakah le, mual tungah kiko-in awng a, amah le amah a pumpi suang tawh a kikui kekgawp hi. in Jesu a galmuh ciangin a kiangah tai a, a mai-ah boksukin, 7. “A Sang pen Pasian’ Tapa Jesu aw, kei bang hong cih nuam na hi hiam? Kei nong bawlsiat lohna dingin, Pasian’ min tawh kong thum hi!” ci-in nakpi-in a kiko hi. 8. Bang hang hiam cih leh Jesu in, “Nang kha nin, mipa’ sung pan taikhia in,” ci-in thu a pia hi. 9. Tua ciangin Jesu in ama kiangah, “Na min bang ahi hiam?” ci-in a dot ciangin, “Kote tampi ka hih uh ciangin, ka min in Legiono ahi hi,” a ci hi. 10. Tua gam sung panin amaute a hawlkhiat lohna dingin nakpitakin a thum uh hi. 11. Tu-in mual tungah vok hon tampi gamta-in a om hi. 12. Kha ninte in Jesu’ kiangah, “Kote tua vokte’ sungah ka lutna dingun vok hon lakah hong paisak in,” ci-in a ngen uh hi. 13. Tua ahih manin Jesu in amaute phalna a pia hi. Tua ciangin kha ninte paikhia uh a, vokte’ sungah a lut uh hi, tul nih bang a pha vok honpite kensang tung pan tuaksukin tuipi sungah a si khin uh hi. 14. Vok cingte tai uh a, khuapi sung le khuata sungah hih thu a gen uh hi. Tua khit ciangin mite in bang thu piang cih a en dingin a pai uh hi. 15. Amaute Jesu’ kiang a tun uh ciangin dawiveipa, tua lai-ah tu-in puan silh a, a lungsim pilvanga om a muh uh ciangin a lau uh hi. 16. Tua thu a musate in dawiveipa’ tunga piangte le vokte’ thu zong amaute’ kiangah a gen uh hi. 17. Tua ciangin mipite in amaute’ gam panin Jesu a paikhiatna dingin a thum uh hi. 18. Gunkuang ah Jesu a kah laitakin tua dawiveipa in amah a zuih theihna dingin a ngen hi. 19. Ahi zongin Jesu in nial a, ama kiangah, “Na lawmte’ kiang ah ciah inla, Topa in na tungah bangzah takin phatna bawl a, bangzah takin hehpihna hong lak cih thu amaute’ tungah va gen in,” a ci hi. 20. Tua ahih manin tua pa pai a, ama aadingin Jesu in bangzah tak bawl cih thu Decapolis gamah tangko a, mi khempeuh in lamdang a sa mahmah uh hi. Hih in Topa' Lungdamna Lai Siangtho ahi hi.