Misiangtho Pope Pius X Pawini. (August - 21)

Misiangtho Pope Pius X in 1835 kumin Italy gam, Giovanni Battista Sarto ah suak hi. Pope a suahma ama min pen Giuseppe Melchiorre Sarto hi. Amah pen lokho mi khat hi a, lai apil mahmah khat zong ahih ban ah thuman citakin gamtat hoih mi khat zong ahi hi. Castelfranco ah kum (4) sung pilna asin khit ciangin Padua Siampi sinna sangah lut theih na ding phalna ngah hi. Aman Siampi sinna sangah kumkhat aman khit ciangin lai pilna hangin pahtawina leh thukhunte hoih takin a zuihna hangin pahtawina te ngah hi.
1858 kumin Siampi suak in Tombolo ah Parish Priest in om a, cinate leh thuzuite in Pasian thu gen dingin amah sam den uh hi. Aman Sacramentu te hawm denin nai tampi sung, mawhsutna ngai-in tu den a, Siampite sep ding nasepte kicing takin sem hi. 1867 kum ciangin Salzano ah Parish Priest sem a, tua lai-ah mite adingin hunbitin kipia khia hi. Ama uuk pen naupangnote Catholic upna thu hilhcianna ahi hi. Pasian thu hilhin puahthakna in Pasian ii khaici te akiatna leitang puahna hi ci-in aman um hi.
1875 kum ciangin Treviso Cathedal Parish Priest dingin teelna ngah leuleu hi. Tua lai ah Siampi sin sang naupangte kha lam makai Siampi leh Siadawpa’ thu dotpi cih vaipuakte ngah hi. 1884 kumin Pope Leo XIII in amah Canon Santo cih mintawh sam a, ama vaipuak behlap sak hi. 1884 kum, November 16 ni-in Siadaw suak hi.
1893 kum ciangin Pope Leo XIII in Cardinal dingin teel a, ni thum khit ciangin Venice khua a makaih dingin vaipuak ap na ngah hi. Tua lai ah kum 10 om a, amah in Tuu cing hoih khat ahih bek tham lo-in Siampi nuntakna a lamsang leh Christian nuntakna lam lak khat ahi hi. Lokho innkuan sungpan apiang ahih mah bangin nasemte leh vanzuakte in suahtakna angah nadingin vaihawm sak hi.
1903 kum, August 4 ni-in Pope Leo XIII ii zalaih dingin teelna ngah hi. Pope sep nadingin Pius ii khutlet motto in “Topa sungah na khempeuh a thak suak sak ding” (To Renew all things in Christ) cih ahi hi. Tua ama motto tawh ki zui-in aman’ pawlpi ii biakpiakna te athak tawh laihin Laisiangtho tawh kisai muhkhiatna te semkhia hi. Aman thungetna, Missa biakpiakna, Siampite nisim zatding thungetna bu, la, Canon law leh Catholic pawlpi sunga kipawlna tuamtuamte puahthak hi. 
Pope Pius in kum (14) phak ciangin Siangtho Pumpi (first communion) sang thei ding cih a ki ciangtan sa hun pan kum (7) pha te in First Communion sang thei ding cih phalna apiakna tawh mi khempeuh in Topa Jesu ii Pumpi san zelzel ding a kisapna ahanthotna hangin amah pen Siangtho Pumpi ii Pope (Pope of the Eucharist) ci-in minthang hi.
Pope Pius X in pawlpi’ mission na sem kipawlnate zong thapia in lamsang aa, Siampite in thuman in a telbaih kammalte tawh Pasian thu a gen nading un ngaihsut hoih pia hi. Europe gam sungah gal kido nate a veng nadingin Pope Pius X ii hanciamna te amawkna suak hi. Hungary minam te ii Emperor kumpi in ama galkapte thupha a piak nadingin Pope kiangah a nget ciangin Pope in “Kei-in kilemna bek thupha ka pia hi, Ki do na hilo hi” ci-in dawng kik hi.  
Pope Pius X in nisim Siangtho Pumpi sanna tawh thupha kingah hi ci-in gen a, Siangtho Pumpi pen ngimna man, ngimna hoih tawh san dingin zong hanthawn hi. Pawlpi sungah Cancer natna bangin kisiatna ding thute aman dal zo hi.
 Pope Pius X in ama nuntak nunung dongin Pope sem a, 1914 kum, August 20 ni-in si hi. A sihma in “Kei-in zawngkhal takin ka suak hi. Zawlkhal takin ka nungta aa, zawngkhal takin sih ding zong ka lunggulh hi” ci-in gelh hi. 1954 kum, May 29 ni-in Pope Pius XII na in Misiangtho in pahtawina pia hi.
Misiangtho Pius aw...Ko te adingin thu hong ngetsak tan.