Living Rosary Prayer Group Solemnly Celebrated the Feastday of St. Philomena (11.8.2024)

A Nungta Khithungetna kipawlna a makaih Rev. Fr. Joseph Pau Kap Mung ( Director of Living Rosary Prayer Group) makaihna tawh Misiangtho Philomena ii Pawi ni Missa Biakpiakna pen August 11, 2024 ni-in St. Philomena Chapel ah nasia takin ki bawl hi. 
           Missa Biakpiakna sungah Rev. Fr. Joseph Thang Nen Zo Mung (Director of OSC & RVA) in kha-an vakna nei hi. A mah in Misiangtho Philomena ii tangthu tom leh Pawlpi sungah kipawlna tuamtuam a omna ii a thupitna, Misiangtho te belin thungetna ii a thupitna te  gen khia hi.
           A tawpna ah thu tampipi ngen leng tampipi ngah, tawmtawm ngen leng tawmtawm ngah, ngen vet kei leng zong  (khuaitan) ei aa ding a kisetsa teng kingah veve hi. Tua a hih mani (khuaitan) bek tawh lungkim lo-in a nungta Khi thungetna sunga a kihel teng pen Pawlpi a lamsang ding te ih hih na thu phawkin thupha tampi ih ngah nangin thu tampipi ngen ciat ni ci-in tha piakna nei hi.
           Kikhop man teh အလှူရှင် te piakkhiat buhcim leh aksa nek na kinei hi.
            Hih St. Philomena Pawi ni-in St. Philomena Chapel ah a kikhawm mi vekpi (150) kim pha dingin ki lamen hi. Hih kikhopna Chapel pen Sing inn thatnih hi-in a hiang sungah Tonu Suangbuk a hoih mahmah khat om hi. A inn, a hiang leh huang sunga om teng khempeuh pen nusia sa Pa Alphonsus Tun Hau Pau te innkuan in abeisa hun kum 2012 kim pawlin Pawlpi a itna tawh a piakkhiat a hih manin lungdam huai mahmah hi.
             A mun pen Sts. Peter &  Paul Parish huamsung (ကညန) ii nung hi-in mailam hun ah Pawlpi mi ki khang semsem ding ahih manin Parish thak dingin mun hoih mahmah khat hong suak thei ding hi.
            Living Rosary Prayer Group te pan ki pan ih Pawlpi sunga om kipawlna tuamtuam te pen Pawlpi a tha khauh sak semsem ding te hi cih phawkin eite pen Topa Jesu ii pumpi tunga om khut leh khe te ih hih manin ih kivakna mun ciatciat pan Pawlpi khantoh na dingin na sem ciat ni.