Misiangtho Helena Pawini. (August – 18)

Misiangtho Helena in AD 248 kumin Asia Minor ah suak hi. Helena te innkuan in ei te mah bangin nasep tawh a nungta innkuan te hi uh a, nikhat Helena sing pua pai a ciah ciangin lampi ah Constantuis I Chlorus a kici Emperor kumpipa tawh kituak uh hi. Kumpipa in Helen a muh phetin hoihsa lua ahih manin teenpihpah hi. A kiteen zawh uh a sawt lo-in, tapa khat nei uh a, amin Constantine ci-in phuak uh hi. Ahi zongin Emperor kumpi in gam vai hangin za liatna deih sem sem ahih manin namlian numei khat tawh ki teengin Helen tawh ki khen kik uh hi. Helen in a tapa a it mahmah bang mahin a tapa in zong a nu it mah mah in a nu thu a mang tapa khat ahi hi.
AD 306 kumin Emperor a sih ciangin a tapa te in a pa za a luah nuam, Emperor a suak nuam ki tuh uh hi. Nikhat, Constantine in mang khat man hi. Tua amang sungah Roma a do nading, a do ciangin Singlamteh pua in gal a do nading mang khat man hi. Ahi zongin ama kiangah galkap tulsawm sim bek om in a dang te kiangah galkap a teng a sim in om hi.
Ahi zong Constantine in ama ii tul sawm sim bek ahi a galkap te tawh singlamteh pua in gal a do uh ciangin gal zo uh hi. Tua ciangin Constantine, Roma Emperor kumpi hong suak a, a nu Helen zong Emperor kumpi ahihna tawh kumpinu za pia hi. 
Constantine emperor kumpi a suah ciangin kum (300) val sung simmawh bawlsiatna thuakna pan Christian te suahtakna pia in amah mah zong Christian suak a, Christian pen gam ii pawlpi in aman’ kipsak hi. Constantine Chirstian a suah ciangin a nu Helen zong Christian suak hi.
Constantine pen Roma emperor kumpi te sungpan Christian a suak masa pen ahi hi. Helen in a tapa emperor kumpi a suah pankipan sum leh paai nuamtak zang thei a, a tapa a ki pia pahtawina sum leh van te mizawngte leh a damlo mi te kibawlna dingin leh khutdawh ngen te pia khia zel hi.
Helen in a tapa uk sung ahi, Holy land ah biakinn te lam in tua te sung pan Topa Jesu a sih lai-a a ki vuina mun kep cing na dingin tua munah biakinn lam hi. A taktak in Helen te Turkey ah a om ahi uh hi. Ahi zongin Holy land ah pawi sim in pai zel zel in Jerusalem ah zong sawtpi om hi. Nungzuipite hun lai-a, Christian te a ki bawlsiat bangin gal kido na om zel a, gal a lelh uh ciangin Topa Jesu Singlamteh lei sungah phumin sel uh hi.
324 kum ciangin Constantine in Topa Jesu Singlamteh zon ding hong lunggulh ciangin kum (80) a pha a nu Helen in mi pawl khat singlamteh ki phumna lei to sakin zong kik sak a, a nunung ciangin Singlamteh mu kik uh hi. Ahi zongin Singlamteh thum na om ahih manin Topa Jesu Singlamteh koi pen hiam cih a ki theih na dingin Helen in a ki bawl zo nawnlo natna nei mi khat samin tua singlamteh te lawng sak hi. Amasa pen singlamteh leh a nihna singlamteh te a lawng hangin bangmah ci lo-in, a thum na singlamteh a lawng ciangin tua natna nei mipa a natna teng dam siang pah ahih manin Helen in Topa Jesu Singlamteh mu ta hi.
Helena in biakinn (80) val bang a lam zo nu ahi hi. Tua hunin a tapa Constantine in Topa Jesu sihna pan a thawh kik na mun ah thawhkikpawi muakna in biakinn khat a lam hangin Helena in tua biakinn mu kha nawnlo hi. AD 328 kumin Helena si a, Constantine ii lam biakinn pen AD 335 kumin ki man zo pan hi.
Helenna in ama nuntakna sungah mizawngte huhna, biakinn lamna te tawh a hun bei sak hi. Amah Misiangtho a suah hangin a tapa Constantine pen pawlpi in Misiangtho in ciaptehna omlo hi. Helena ii lim te ah Singlamteh a kitawisakna in Topa Jesu ii Singlamteh lahna ahi hi. Misiangtho Helena pen innkuan buaina a om te, innkuan/nupa ki khen te ahuh Misiangtho ahi hi.
Misiangtho Helena aw...Ko te adingin thu hong ngetsak tan.