LAISIMPEN NGEINA HOIH IN KOIH NI! ✍️John Kap

Zomi sungah Zosuantate in agentheih zel kammal pawl khat enleng, laisim leng ihmut suak, ka mittui luang cih bang danin genthei uhhi. Ahih hangin Korea Drama khawng en le-uh pil sinsen! zan hak thei zah dongin enzo uh hi, zong tuzo mawk uh hi. A taktakin ci leng na khempeuh i lungsim thu hi a, veeina, lainatna, deih takpina cihte a omkei leh i ihmut suakthei mahding hi.  Tu-in ei Zomite sungah zolai tawh aki-at laihawm tuamtuam hong omta hi. Cimtak kei ni. A atte in zong mitkham liangmah a, kaikhawm geel, at cihbangin asep uh hi a, thusia peuhmah ki-at lo ding a, i khantoh nang i phat tuampih ding mah a zong leh a hongpiate ahi uh hi.
Thuthang tuamtuam ahilo lai ki-at ahi thulu  khat peuhpeuh isim tak ciangin i theihding thu pawlkhat i pulak nuam hi.
-Agen a atpa in hong pulak khiat nop athu bulpi bang hiam?
- Tua thubulpi tungpan ama ngaihsut zia bang?
- Hong pulaaknate I teci muanhuaite bang teng?
-Athu pulaakte in a tang zaizawin a sang thei hiam?
-Sazian lakkhiatna … percent % tawh lahna cihte a kip amaunhuai takpi mah hiam? Ahi mah hiam?
--A ipsim, akoih khiat, a mangngilh a om hiam?
-Athucing tecite sangin alungsim thuaknate
masak zawhiam?
-Athugen pa/nu ahih leh a awsuah dan, a omdanin bang honglak hiam?
-Lang khatbek, ama abek thupisakna kammal a zang hiam?
-A gen a zat kammalte I et ciangin a cihnop, a dinpih thu imuthei hiam? Koilam panin dingin genzaw hiam?
-Ei hi leng, koilam ah pang ding/dinsawm? Atawpna thu tomno khat tawh lahkhiat sawm in/pulaak theih sawm in.
Laisimna leh zakna kibang theilo hi. I zak i ngaihna ah lunglutin kilungngai zaw hi. Laisim bel kisimsim thei hi. Zakna ngaihna pen khatvei genkik ding cih pen kician nawnlohi. I ngaihsutna, i lung ngaihnate a  i tathiam ding kul a, zong kilawm hi. Atawn tungin ngaihsun, khensatna hangin banghiam khat i muthei ding hi. Zong i ngaihsun theiding hi.
 Mi a tamzaw ii khensatna lakna pan ei mahmah in khensat theihna hong omthei panding hi. Tua khit ciangin ka laisim pen bang namhiam cih a tawntungin ngaihsuthuai a, ngaihsut ding zong kilawm mahmah ahi. Thukan, thuzon nam lamsang pen  ahilian, a tuacilian cih a kician bukimte koi pan  la cih  etkakna saziante, cihbang ki hel thei hi. Tua ahihman in banglai i sim zongin i za zongin  tuate tung pan i muh dotnate sittel huai hi. Telsitset a, ei mahmah in don a hanciamtak a, ilahkhiat zawhding kisam mahmah hi. 
 Mihingte nasep silbawl vaihawm nate khempeuh zongsatna-in hong piangkhiasak a, laisimna ciaptehna cihte zong hih zongsatna pan kisuaktacih om theilo hi. Mi pawlkhat te in a dangdangvaite-ah a zongsat uh hangin laisimna lian'tawhpen zongsatding cih ngaihsutin zong neingeiloa, mangin zong manlo uh hi. A simnop ciang sim, cih bangin om uh a, simngeilo ahihman in simzolo, ciamteh zolo uh hi. A taktakin laisimna pen mi kiangah annekna, tuidawna, holimna bang in thupi vaihawmding ahi hi. Annekna tuidawnna i cihte pumpi ading a, tha hongguan hibek a, lungsim deihna pen tha hongguan zolo hi. Lungsim icih zong pumpi mah bangin pilnna theihna tuamtuam ahi, tha (အာဟာရ) kisam hi. Lungsim thahatte in tuabang a thanam pawl kisam mahmah a, ngaihsut tehkak nate kimat in bawl a, ii omna ii kiim ii paam a om nate tawh lungkimlo-in tua te hong lamlak bang a, pilna I theih ding tampitak I kisam hi. Tua ahihman in laisim pen ngeina in koihin zong’sang’ leng hong kizang thei mahmah ding hi. 
✍️John Kap