"A mah a lian sem sem dinga kei ka neu sem sem ding hi ."

Daily Homily by Fr. Joseph Zo Mung (11.1.2020)
(Jn 3:22- 30) Na sungah Tuiphum pa John ii tuisawp te leh Topa Jesu ii tuisawp te ci-in a om na sungah Tuiphum pa John in kiniamkhiatna tawh a ma nungzui te Topa Jesu nungzui suak sak hi. A mah a lian sem sem dinga kei ka neu sem sem ding hi ci-in kiniam khiat na lungsim Topa Jesu nung zui hi. Hih pen Pasian nasem te aa dingin etteh huai mah mah hi. Khat vei vei ciang ei Pasian nasem te in mite pen Topa Jesu nungzui a suah ding sangin eite nung a hong zui dingin ki deih zaw kha thei hi. Tua a hih manin Pawl zong, Pawl kai in khat leh khat ki nial na om thei hi. Tua banga ih gamtatna te pen ki khial mah mah hi cih thu tuni lai siangtho in hong thei sak hi. Tui phumpa John mah bangin kiniam khiatin thu manthu tak ih teel khit teh mi dang te zongin thu man thutak a tel nangin ih hilh theih ding leh ei nung a hong zui te pen Topa Jesu kiangah ih pai sak ding, Topa Jesu nungzui ih suah sak ding a ki sap na thu te tuni Lai Siangtho in hong thei sak hi. Topa Jesu hong hilh sa thu man thu tak te Nu Catholic Siangtho Pawlpi tung tawn in ngah thei ih hih manin Pa Pasian tungah lungdam ko ciat ni. Thu man thutak in eite hong suak ta sak in lungnop tawldam na hong pia hi cih thu te hong gen hi.