IH PA THUDOT IN NEI IN ZAH TAK CIAT NI

RVA Zomi Chin Service aza a ngai nu leh pa u leh nau te aw tu ni Innkuan nuntak zia cih Thulupi nuai-ah IH PA THUDOTIN NEI-IN ZAHTAK CIATNI cih thulu neu khat tawh thutangko na kong nei nuam hi. Nu leh pa u le nau te aw na damkim ciat tek uh hiam? Hih RVA Zomi Chin Service nangaihna hangun amuang tawntung leh ih upna akhang sak zo tektek dingin ih biak Topa Pasian in note tungah thupha nam kim hong piaciat ta hen ci-in thukong ngetsak masa hi.
Mihing khat in amah a it mahmah leh adeihsak mahmah a Pa, ado khak ni akipan thuhoih thupha ahilh ding mi nei nawnlo hi. Tua ni akipan lam khialh hong kipan hi. Apianna a Pa thu dong nuam nawn lo-in midangte thu adot ciangin a Pa tawh akisiat theih nading thu vive na hih lel mawk uh hi.
Na Nu leh Na pa na khasiatsak khit ciangin bangzah takin hau ta lecin na sih nading hauhna zong hi thei lel hi. Na Nu leh na Pa na khasiatsak manin lungnopna na nei thei taktak kei hi. “Tuahsia kha leng maw” cih khat in na lungsim hong uk hi. Tua bang a na dipkuat theihna pen Nu leh Pa te “Gau” a kici, Nu leh Pate vangliatna hang ahi hi.
Na mavan nop a na daupai nop leh hun om lai ahih manin na Nu leh na Pa lungkimsak ding hanciam teitei in. Na Nu leh na Pa in mawh maina hong piak khit ciangin na van hong zang mahmah ding a na ma hong vang mahmah ding hi.
Absalom in a Pa tawh akisiat khit ciangin a lungkhamna te a Pa dong nawn lo-in midang vive dong hi. A pa thu adot lai-in lungkhamna tuak kha ngei hetlo napi, midang adot khak akipanin lungkhamna leh thusia vive hong mu hi. Amuan mahmah a Ahithofel kiangah a kalsuan zia ding adot ciangin akhantoh nading leh a Pa tawh akilem nading peuhmah nagenpih vetlo hi. A Pa tawh akisiat theih nading vive na gen pih lel mawk hi.
Midangte thugente a up khak tak ciangin a Pa telkhial semsem hi. Tua mah bangin nang zong na Pa hong deihsak zahin hong deihsak ding mi dang omlo hi cih phawk gige in. Na sunghte in zong hong it mahmah na cih hangin na zi hang bekin hong it uh hi a, na zi ma lecin hong mudah pha mahmahpah lel ding uh hi. Ahih hangin na Nu leh na Pa in nang hong mudah ngeilo ding uh hi.
Na Pa tawh na kisiat khit akipan nang zaknoplam hong genpihte pen nang hong koppih a bat hangin na Pa tawh na kisiat semsem ding adeihte ahi hi. Na Pa mahmah agilo hi, nang mawhna om kei, hong cite pen hong bum hong tuahsiasak nuamte ahi uh hi. Na Pa tawh kilem kikin hong cite na mudah ding a, na Pa a mawhzaw hi, hong cite na it zaw ding hi. Ahih hangin na Pa’ khasiatna gu na thuak ni ciangin na Pa tawh kilem kik in hong cite’ hong deihsakna leh na Pa a mawhzaw hi hong cite’ hong bumna na tel theipan ding hi. Ahih hangin na zekai khin ta ding hi.
Absalom in zong alaitah hunlaitakin Ahithofel in thuhoih hong hilh kei si e, ci kha thei ding hi. Na Pa tawh kilem in hong ci lo-in, na Pa zineu te luppih in hong cih zawzen lawmlawm ci kha thei ding hi. Tua mah bangin nang zong na Pa tawh kilem ding lamsang hong genpih lo peuhmah hong bum hongsisak nuam te ahi uh hi. A Pa sangin midangte thu a dong zawte leh mi gen khempeuh a um pahpah te’ innkuan sungah kilemna om theilo hi.
Na Nu leh na Pa in hong it taktak lo hi, na naute it zaw uh hi hong ci peuhmah hong it taktak lo te hi pah hi. Nu leh Pa in hong it taktak lo cih bang om theilo hi. Midangte’ hong it ding pen I thalawh tawm, I zon tawm hi a, a om sa it na hilo ahih manin bei baih mahmah lel hi. Ahih hangin Nu leh Pate’ itna pen I thalawhtawm itna hilo in a omsa itna ahih manin bei hun nei ngei lo hi.
I thalawh tawm ahih loh mah bangin it huai het kei ta lehang zong hongit veve uh hi. Ka zi in kei hongit mahmah hi, na cih hangin zawlta khawng nei-in lawm dang ngai lecin hong ciahsan lel ding hi. Thalawh tawm itna ahih man ahi hi.
Tua mah bangin ka pasal in kei hong it mahmah hi, na cih hangin midang tawh mawh kha lecin hong malel ding hi. Ahi zongin hi bang ginat lohna te hangin Nu leh Pa’ hong itna bei tuanlo hi. Tua ahih manin na Nu leh na Pa’ hong itna zah in hong it ding leitungah mihing khat zong om peuhmah lo hi cih phawk in ih Nu leh ih Pa kha siasak peuhmah lo-in a it tawn tung tanu tapa te ih hih zawh nadingin ih biak Topa Pasian in thupha hong pia kim ciat ta hen. Lungdam hi.