Lungdamna Laisiangtho John 13:21-33,36-38 sungsimna (March 26,2024) Tuesday

Catholic Nisim Lungdamna Laisiangtho John 13:21-33,36-38 ------------------21. Jesu in hih thu a gen khit ciangin, a lungsim gim mahmah a, “Ken a man takpi kong genin ah, note’ lakah khat in hong lehhek ding hi,” ci in a genkhia hi.

22. A nungzuipite in kua a cihna ahi hiam, cih thei zo lo uh ahih manin khat le khat a ki-en uh hi.

23. Amaute’ lakah Jesu in a it a nungzuipa Jesu’ zomah kingamin a om hi.

24. Amah in kua a gen ahi hiam, cih a dong dingin Simon Peter in tua nungzuipa a limin lakin a dongsak hi.

25. Tua ahih manin amah, Jesu’ ang ah awnphei a Jesu’ kiangah, “Topa aw, kua a gen na hi hiam?” ci-in a dong hi.

26. Jesu in, “Khomun them khat meh kuang sungah ka diah khit ciangin ka piak dingpa, tua pa ahi hi,” ci-in a dawng hi. Tua ciangin amah in khomun them khat a diah khit ciangin Simon’ tapa Judas Iscariot a pia hi.

27. Judas in khomun a san phetin a sung ah Satan a lut hi. Jesu in ama kiangah, “Na hih ding thu a manlangin hih pah in,” a ci hi.

28. Tu-in amah in bang hang in Judas’ kiangah tua bangin ci ahi hiam, cih sabuai-a tute kuamah in a thei kei uh hi.

29. Judas in sumpi kempa ahih manin, “Pawi-a zat ding na kisam khatpeuh lei dinga sawl ahih kei leh mizawngte na khatpeuh pia dinga sawl hi ding hi,” ci-in pawlkhat in a ngaihsun uh hi.

30. Judas in khomun them khat a san khit phetin amah a paikhia hi. Tua hun in zan laitak ahi hi.

31. Judas a paikhiat khit ciangin Jesu in, “Tu-in Mihing’ Tapa a min kithangsak a, ama sungah Pasian zong a min a kithangsak hi.

32. Ama sungah Pasian a min a kithansak leh, Pasian in Tapa a minthangsak dinga, thakhatin a min a thang pah ding hi.

33. Kong it ka tanote aw, keimah in note tawh tawl khat sung bek kong omkhawm lai ding hi. Note in kei nong zong ding uh hi. ‘Ka paina munah note nong pai thei kei ding uh hi,’ ci-in Jew mite’ kiangah ka gen bangin tu-in note tungah kong gen hi.

36. Simon Peter in Jesu’ kiangah, “Topa aw, koi ah pai ding na hi hiam?” ci-in a dong hi. Jesu in, “Ka paina ding munah tu-in nong zui thei kei ding uh hi. Ahi zongin tu-nung ciangin nong zui ding uh hi,” ci-in a dawng hi.

37. Peter in, “Topa aw, keimah in tu-in bang hangin hong zui zo lo ding ka hi hiam? Keimah in nang aadingin ka nuntakna kong pia ding hi,” a ci hi.

38. Jesu in, “Nangmah in kei’ aadingin na nuntakna piakhia ding na hi hiam? Ken a man takpi kong genin ah, ak a khuan ma-in nangmah in thumvei kei nong nial ding hi,” ci-in a dawngkik hi.

+Hih in Topa' Lungdamna Laisiangtho ahi hi.

- Christu Topa aw na tungah phatna om ta hen.