Misiangtho Paul of the Cross Pawini. (October - 19)

Misiangtho Paul of the Cross in 1694 kumin, Italy gam, Ovada ah suak hi. Aneu tungpan Pasian thu hanciamin thuman na tawh nungta hi. Kum (15) aphak hun in Topa Jesu gimthuakna tawh kisai Pasian thugenna khat a zak pankipan ama nuntakna sungah kidekna tawh kalsuan ding kipan hi.
1720 kumin, Tonu Maria kiangpan, Puantual vom silhin Topa Jesu gimthuakna te alungngai den dingin kipawlna khat aphuat nading thu sawlna ngah hi. Tua thu tawh Paul Roma ah pai a, ahi zongin Vatican sung nangawnah lut khuan ngah lo hi. A ciah nalampi ah munhoih khat mu a, tua lai ah asanggampa John tawh Zateih nuntakna tawh om ding khensat hi.
Siampi Ordination angah khit ciangin aunau un, adam lo mi te huhna leh Pasian nasepna mipi muhin sem khia uh a, amau Pasian thu hilhna te in Topa Jesu gimthuakna te siksan hi. Tua banah mite’ mawhna dan dingin khauhtakin amau leh amau mipi maiah mawhna dan lohna te kipia uh hi.
1741 kumin Pope Benedict XIV na in Paul ii phuah, Passionist Congregation pen kipsakna pia a, tua ki pawlna ah mi tampi lut in Pasian ading kipia khia uh hi. Paul in ama nuntakna nunung hun pen amah kia om na tawh beisak in, 1775 kumin, Rome ah si hi.
Misiangtho Paul of the Cross aw.....Ko te a dingin thu hong ngetsak tan.