Misiangtho Polycarp Pawini. (February 23)

Misiangtho Polycarp pen Lungdamna Laisiangtho at ahi, Misiangtho John in Christian upna lam ah amakaih banah Smyrna khua ii siadaw dingin teel hi. Misiangtho Polycarp in Misiangtho John hilhna hangin up na tawh kisai lamkhial mi te pelh nading tel mahmah hi.
Khat vei Pasian aum lo Marcion tawh lampi ah kituak uh a, Polycarp in ahopih loh ciangin tua mipa ahehsuak ahih manin Polycarp kiangah “kei nong thei hiam” ci-in adot leh Polycarp in “ hong thei mah ing, nang pen dawi ii ata cil na hi hi” ci-in dawng kik hi. 155 kum, Rome kumpi in Christiante abawlsiat hunin Polycarp aman dingin galkap pawlkhat paisak hi. Galkapte atun ciangin Polycarp in nitakan vak in zahtakna tawh thu angetsak leh galkap tampite kikhel uh hi.
Ama upna nusia dingin ahanthawn kumpipa kiangah “kum tampi Christu na kasem hi. Kei tungah Topa bangmah khial ngei lo hi. Bang ci bangin ka honpa nusia zo ding ka hi hiam? Nang na hih leh tawmvei sung kuangin adai pah ding mei tawh kei nong khem hi. Ahi zongin nangin note bangin agilo mite ading akibawl atawntung meikuang na mangngilh hi” ci hi.
Misiangtho Polycarp in teipi tawh sutna thuakin vut asuak dongin haltumna thuak hi. Asih ma deuh in “Pasian aw…upna hangin asi te sungah kei zong nong kihel sak a, Topa Jesu ii si dawn theihna thupha ngah theih nadingin hih hun nongpiak hangin ka lungdam hi” ci-in thungen hi.
Misiangtho Polycarp aw….Ko te adingin thu hong ngetsak tan.