Monthly Recollection of Priests of Kalay Zone (11.2.2023)

Tuni Kalay Zone aa om Siampite Pasianthu Lungngaihna ah Laisiangtho (John 11:21) "Topa aw, nang a om hi lecin ka sanggampa silo ding hi" ci-in Mary leh Martha te in a upna uh Topa Jesu tungah a pulaak na kammal bulphuhin Kalay Diocese hongcing hongkem His Excellency Bishop Felix Lian Khen Thang in kha-an vakna hong nei hi.
A mah in "Siampite ii nuntakna pen mite aa dingin a nungta ih hih manin mite tawh ih om khop ding kisam hi, a nuamte tawh nuam khawm ding, a dahte tawh dah khawm ding (being with the people, being for the people) " ci-in mite tawh om khop ding a thupit na thu hong gen hi.
Tua banah mite tungah itna leh hehpihna neih ding a kisapna thu a diak diak in tu laitak ih gamsung buaina hang tawh haksatna a tuak, a cimawh mite tungah hehpihna nei-in huhna ih piak ding a kisapna thute zong hong gen hi.
Siadawpa in ama ii a sepkhiatna ahi cina a vehna leh misi agalna te hangin innteek te ii lungkimna, kha muanna angahna te leh ama ii (feeling) te zong hong hawmsawn hi.
Tua banah thuzui mite ii natlesat hun ah Siampite in ih ompih manin thuzuite in kha muanna ngah hi cih thu zong hong gen hi. honggen kawmin Siampite in thuzuite ki tangsapna mun mun ah pumpi le kha aa ding huh zawh zahin limtakin huh ciat ni ci-in thapiakna hong nei hi.
A tawpna ah "Lord teach me to be generous" ci-in Misiangtho Ignatius in thu angat mah bangin eite in zong "Topa aw, midangte tungah kacit zawh nang, midangte tungah hehpihna ka neih den zawh nangin lam honglak in" ci-in thu ngen ciatni cih tawh thukhupna hong nei hi.
Siadawpa thu gen na a man khit ciangin a ngeina mah bangjn khikhin na, mawh sutna leh thungetna (Midday Prayer) te ki nei suak hi.
Pasian thu lunngaihna hun a manciangin thu zaksakna leh sun-an nekkhopna tawh tuni hun ki masak hi.
Tuni pen Siampite (4) pen buaina tuam tuam hang tawh hong kihel zolo in tua lo teng cidamin kihel kim thei uh hi.