Catholic Nisim Lai Siangtho. Hun Nautaang Nipikaal (27) Na (MON.) October 7.2019

Lungdamna Lai Siangtho.

(Lk. 10: 25-37)

25. Tua khit ciangin thukham hilhsia khat Jesu a ze-et dingin hong dinga, “Sia aw, tawntung nuntakna ka luahna dingin bang ka hih ding hiam?” ci-in a dong hi.

26. Jesu in, “Thukham ah bang kigelh ahi hiam? Nang bangci-in na ngaihsun hiam?” ci-in a dong hi.

27. Amah in, “Na Topa Pasian, na lungsim khempeuh, na kha khempeuh, na thahatna khempeuh, na pilna khempeuh tawh na it in. Nang le nang na ki-it bangin na vengte it in, ci-in kigelh hi,” ci-in a dawng hi.

28. Jesu in, “Na dawnna thu ahi takpi hi. Tua bangin zui le cin na nungta ding hi,” a ci hi.

29. Ahi zongin tua pa amah le amah a dik kitangsak nuam ahih manin Jesu’ kiangah, “Tua ahih leh ka vengte kua ahi hiam?” ci-in a dong hi.

30. Jesu in, “Mi khat in Jerusalem khua panin Jericho khua ah a paisuk laitakin, misuamte tawh a kituak hi. Misuamte in tua pa’ puan hawkkhia a, nakpi-in a sat khit uh ciangin, si dek takin a nusia uh hi.

31. Tu-in tua lampi mah tawnin siampi khat paisuk a, tua pa a muh ciangin peelin a nusia hi.

32. Tua bangmahin Levi mi khat hong pai a, tua pa a muh ciangin, a langkhat ah peelin a paisan hi.

33. Ahi zongin Samaria mi khat khualzinin a pai laitakin, tua pa gei-ah hong tunga, a muh ciangin hehpih huai a sa hi.

34. Amah va nai-a ama liammate sathau le leenggahzu nuhin, puan tawh a tuamsak hi. Tua khit ciangin ama la tungah tuangsakin, zin tunna inn ah paipih a, tua lai-ah a khoisak hi.

35. A zing ciangin amah in denarii tang nih lakhia a, zin inn ngakpa’ kiangah, “Amah na khoi in; a bei khempeuh kong pai kik ciangin kong loh ding hi,” a ci hi.

36. Hih mi thumte lakah misuamte’ khutlum a thuakpa’ aadingin kua pen in a veng pa hi, ci-in na ngaihsun hiam?” a ci hi.

37. Thukham hilhsiapa in, “Amah hehpihna a lakpa in a vengpa ahi hi,”ci-in a dawng hi. Jesu in ama kiangah, “Nang zong pai inla, tua mah bangin na hih in,” a ci hi.

Hih in Topa’ lungdamna Lai Siangtho ahi hi.

#DailyBible, #RVA, #WordofGod, #Bible, #Laisiangtho,

#Tedim, #KalayDiocese, #Zomi, #Gospel,

Website: http://dtedim.rveritas-asia.org/

Like us on https://www.facebook.com/rvatedimchinservice ,

See us on https://www.youtube.com/channel/UCvMw-hJ1GDQ