Misiangtho Nicholas pawini. (December 6)

Christmas letsongte ahawm khia den ahi, (Santa Claus) ci-in mite theih, Misiangtho Nicholas in kumzalom 3 hunin, Asiaminor, Patara khua-ah suak hi. Nicholas pen Myra, tulaitakin Turkey gam Siadawpa ahi hi. Amah pen a nulehpa in sihsan baih ahihmanin nulehpa gamh teng luah in hau mahmah hi. A mahin mizawngte leh migentheite ahuhna in a neih a lam teng beilawh liang hi. Misiangtho Nicholas pen Christmas hong tun sial a Santa Clause ih cih den pa ahi hi.
Azawng mahmah papi khat om a, tanu thum nei hi. Amau gam ah numeite in a pasal dingte lei uh hi. Hih papipa pen zawng lua ahihmanin a tanute pasal neisak zo lo hi. A tanu upen in lawmngaih hong nei hi. Tua in apa adingin dahhuaipi khat hong suak hi. Cihna ding thei loin khitui naptui tawh akidiah laitakin meikhulawng panin suangmanpha bekbek thungkuah dim khat ki khiat suk hi. Tua tawh a tanu upen in pasal nei zo hi. A tanu nihna zong tua dan mahin suangmanpha thungkuah dim khat ki khiat suk ahih manin pasal nei zo hi. Papipa in hibanga ong huh niloh pen kua hi ding hiam cih thei nuam ahihmanin a tanu thumna in pasal aneih ding ciangin meikhulawng geiah na pang sim hi.
Zankim laitakin pasal khat ippi tawh hong pai a, a ippi sung panin thungkuah khat la khia in meikhulawng sungah khia suk dingin akithawi laitak papipa in na man hi. Hoihtak a et leh midang na hi lo-in a Siadawpa uh Nicholas na hi mawk hi. Nicholas in papipa kiangah hehpihna tawh hih thu kua mah tungah gen kei in ci-in kunhi. Ahih hangin sawtpi ki-im zo tuan lo-in a tawpna ah tua bangin letsong kipia sim a om ciangin mipite in Santa Clause in hongpiak hi ci uh hi. Tua akipan Santa Clause cih kammal kizangh suak hi. Misiangtho Nicholas in naupangte it phadiak a, letsong tampipi pia hi.
Ama sih khit nungah khatvei Turkey tuipi tungah huih khauh lua ahihmanin tembaw khat cimawh hi. Tembaw tunga tuang tengin lau lua uh ahihmanin Misiangtho Nicholas kiangah thu a nget uh leh Nicholas pen amau tuanna tembaw tungah hong ding a, huihpi teng a vengh na dingin thu pia hi. Tua khit ciangin siatna bangmah thuak loin a vekun suakta uh hi.
Kumpi Diocletian in Christian te a bawlsiat ciangin Nicholas pen Myra khua pan ki hawlkhia hi. Nicholas pen bang kum lianin si hiam cih kithei lo a, ahih hangin a sihni pen December ni 6 ni ahi hi.
1087 kum ciangin Italy gammi sumbawlte in Misiangtho Nicholas ii guhsia acianlai teng na gu sim uh a, Italy tuipi nawla Tembaw khawlmun Bari khua ah phum uh hi. Tua munah biakinnpi kilam hi.
Nicholas in asih khit ciangin zong ama hehpihna leh piakkhiat nopna lungsim nungta ahih manin mun khempeuhah thang hi. Kumzalom 19 hunin, Dash minam, Protestan pawlkhat in Siadawpa min pen Santa Claus ci-in sam uh a, amah pen lungnuam takin om thei-in aminthang leh mitampi’n adeih Christmas letsong te ahawm khia pa in ciamteh uh hi. Ama silh puantual san ah Siadaw Mitre (a'gufcsm) leh pualtual khutngawngah a kang setsit tuu mul te tawh hoih tak in kizem hi. Santa Claus in Christmas ii thupitna hi a, leitung bup aom, mizawngte tungah it na leh piakkhiatna neihna hong lak hi.