Catholic Nisim Lai Siangtho. Hun Nautaang Nipikaal (25) Na (SUN.) September 22.2019

Lungdamna Lai Siangtho.
(Lk. 16: 1-13)

1. Tua khit ciangin Jesu in a nungzuite’ kiangah, “Mi haupa khat in sumkem khat a nei hi. Tua sumkempa in a topa neihsa teng a zat beisak hi, ci-in kingawh hi.

2. Tua ahih manin amah in sumkempa sam a, ama kiangah, ‘Na thu ka za khin hi, a bangci thu ahi hiam? Na sum ciaptehna lai hong pia in. Bang hang hiam cih leh, sumkem nasep na sem nawn kei ding hi,’ a ci hi.

3. Tua ciangin sumkempa in a lungsim sungah, ‘Tu-in bang cih ding ka hi hiam? Ka topa in ka nasepna pan hong tawpsak ding hi. Lei to dingin lah ka hat nawn kei a, khut dawh a nget ding lah ka maizum hi.

4. Sumkem za hong kiatsak khit ciangin, midangte in amau inn ah hong san theihna dingun ka hih ding ka thei ta hi,’ ci-in a ngaihsun hi.

5. Tua ahih manin a topa’ sum a bate a vekpi-un a banbanin a sam hi. Amah in a masa pen kiangah, ‘Ka topa’ tungah bangzah na ba hiam?’ ci-in a dong hi.

6. Amah in, ‘Olive thau bung za khat ka ba hi,’ ci hi. Ama kiangah, ‘Na leiba lai va la inla, tu inla sawmnga-in bawl mengmeng in,’ a ci hi.

7. Tua ciangin adang khat kiang ah, ‘Nang bang zah ba na hi hiam?’ ci-in a dong hi. Amah in, ‘Mangbuh seng za khat ka ba hi,’ a ci hi. Sumkempa in ama kiangah, ‘Na leiba lai va la inla, sawmgiat-in bawl in,’ a ci hi.

8. A topa in a diktat lo sumkempa a geelsiamna hangin a phat hi. Bang hang hiam cih leh, leitung mite in hih leitung nasepnate ah khuavak sunga om mite’ sangin a geelsiamzaw uh hi.

9. Ken kong genin ah, a kip lo leitung hauhnate tawh lawm na ngahna dingun na zang un; tua hi leh tua hauhnate a bei ciangin tawntung innpi ah note hong dawn ding uh hi.

10. “Thu neute’ tungah a citak mi in, thu liante’ tungah zong citak hi. Thu neute’ tungah a muanhuai lo mi in thu liante’ tungah zong muanhuai lo hi.

11. Tua ahih manin leitung hauhna tungah na cihtak kei uh leh, hauhna taktak a kem dingin kua in note hong muang ding ahi hiam?

12. Midang khatpeuh neihsa tungah na cihtak kei uh leh note’ aading neihsa kua in hong pia ding ahi hiam?

13. Kuamah in to nih’ na sem khawm thei lo hi. Bang hang hiam cih leh amah in khat mudahin khat a it ding hi. Khat beelin khat a simmawh ding hi. Note in Pasian’ na le leitung hauhna nasem khawm thei kei ding uh hi,” a ci hi.

Hih in Topa’ lungdamna Lai Siangtho ahi hi.