Catholic Nisim Lai Siangtho. Hun Nautaang Nipikaal (23) Na (THUR.) September 12.2019

Lungdamna Lai Siangtho.

(Lk. 6: 27-38)

27 Ahi zongin ka thugen a za note’ kiangah kong genin ah: Na galte na it un. Hong mudahte’ tungah thupha na bawl un.

28 Hong samsiate thupha na pia un.

29 Hong bawlsiate’ aading thu na ngetsak un. Mi khatpeuh in na pang lang khat hong bet leh a lang khat zong na dawh un. Mi khatpeuh in na puantualpi hong laksak leh na puanak a lak ding na kham kei un.

30 A hong ngen khempeuhte na pia unla, na neihsa hong laksak peuhpeuh kiangah bangmah na ngen kik kei un.

31 Note’ tungah hong kibawl ding na deih bangun, note in zong midangte’ tungah na bawl un.

32 Note in no hong itte bek na it uh leh bang phattuamna ngah ding na hi uh hiam? Bang hang hiam cih leh mawhneite nangawn in amau a itte a it uh hi.

33 Note’ tungah thupha hong bawl mite’ tung bekah thupha na bawl uh leh, bang phattuamna ngah ding na hi uh hiam? Mawhneite nangawn in zong tua bangin ahih uh hi.

34 Hong loh kik dinga na lamette bek uh na leiitawisak uh leh bang phattuamna ngah ding na hi uh hiam? Mawhneite nangawn in zong tampi a ngahkikna dingun mawhnei mite a leiitawisak uh hi.

35 Ahi zongin note na hih uh leh na galte uh itin, amaute’ tungah a hoih bawl unla ngah kik ding khat beek lamen loin na leiitawisak un. Na thaman uh lian dinga, Sang Penpa’ tate na hi ding uh hi; bang hang hiam cih leh, amah in lungdam ding mel a thei lo mite le a tatsiate nangawn a hehpih hi.

36 Na pa un hong hehpih mah bangin note in zong hehpihna na nei un.

37 “Midangte thu na khen kei un, tua bang hi leh note in zong thukhenna na thuak kei ding uh hi. Midangte na mawhsak kei un, note zong hong kimawhsak lo ding hi. Midangte’ mawhna na maisak un, note’ mawhna zong hong kimaisak ding hi.

38 Pia un, note zong hong kipia ding hi. Note’ tehna sangin a henhen, a tahtah, a dim letin na ang sung uh ah hong kipia ding hi; bang hang hiam cih leh, note’ zat tehna tawh note’ aading hong kitehsakin hong kipia kik ding hi,” a ci hi.

Hih in Topa’ lungdamna Lai Siangtho ahi hi.