Misiangtho Zita of Lucca

“Kiniamkhiat in. Mite in ki liatsakna, kiphatsakna tawh hong simmawh hangin lungsim kiniamkhiat takin thuakin. Pasian tapa mahmah in amah a bawlsiate kamkhat zong thuk kik lo-in kiniamkhiatna tawh singlamteh pua liang hilo ahi hiam. Kiniamkhiat in. Vantung gam in nang ading hong hi ding hi.”
Misiangtho Zita in 1200 kum in a genthei mahmah innkuan sungpan hong piangkhia hi. Ama pilna sinna in a Nu ii a hilh ahi, mun khempeuh, na khempeuh tungah Pasian zon na cih pilna ahi hi. Aneu tung pan in upna picing nei-in Pasian thu a hanciam mahmah khat ahi hi. Kum (12) aphak ciangin Fraternelli a kici innkuante kiangah inn nasem in om hi.
Zita ii nasepna inn pen Biakinn tawh kinai ahih manin amah nisim in Missa kah thei hi. Zita in a sep peuhpeuh pen Pasian nasem bangin ki ngaihsun in a gim atawl mahmah phial zongin Pasian tawh kigawm den hi. Aman ahan ciam mahmah hangin Fraternelli ah amah ki simmawh mahmah hi. Innteek te’ galdo na, simmawhna, khuttum tawh tupna, satna te Zita in kamkhat zong thumlo in lungduai takin thuak hi.
Innteng nasem Zita in ama tungah simmawh bawlsiatna te lungduai takin thuakin nisim Pasian tungah ki-ap na ah lungnopna angah banah ama thuakzawh hatna zong khang sak hi. Asawt ciangin a innteek te in Zita lungduaina ii manphatna te telin Pasian thupha hanga Zita ngah thupha te pahtawi den uh hi.
Tua bang pahtawina te hangin Zita in kiphasakna cih nei tuanlo in kiniamkhiatna tawh aom na hangin a inntek te in ama thumanna um semsem uh aa, Fraternelli ii inn sung vai khempeuh a zekpi dingin a za khan uh hi. Tua bangin a za a khan hangin zong Zita in amah a simmawh ngei te thukkik se lo-in Pasian na a sem bangin ki ngaihsun in a sep peuhpeuh ahoih pen dingin han ciam hi.
Tua banah Zita in thungetna leh antanna te nei den in Topa Jesu hong vaikhak ahi, “Alian pen te in adangte nasem bangin amau leh amau ki ngaihsun uh hen” a cih kammal bangin ama neih za, thuneihna pen thuman na tawh zang hi. Ama khutnuai aa nasemte tungah hehpihna lak denin amaute in zong mizawngte tungah hehpihna lak sawn uh aa, amau mahmah kidekin tua amau kidekna te sungpan midangte huhna piakhia uh hi.
Zita nuntakna sungah Missa kahin Siangtho Pumpi sanna in ama thalakna bulpi hi aa, lungdamna hangin a kia mittui te tawh kidim den hi. Nasep atam mahmah hangin Pasian tawh kigawm nading hun koih ngiat hi.
Zingsang khat, huhna a kisam mikhat huh dingin ama nasep nusia in paikhia hi. Fraternelli aa nasemte in Zita paikhiat zong mu uh hi. Ahi zongin Zita nasepna ahi, moh emna anbuk a et uh leh vantungmi te in Pongmoh em in a om uh mu uh hi. Zita in ama sih ding hun a theihkholh banah a dangte kiangah zong zasak hi. Tua ahih manin a sihma in Kha tawh kisai kiginkholh ding te hoih takin kigingkhol thei aa, 1271 kum, April 27 ni-in lungnuam takin si hi. A naseppih te in amah Misiangtho in ciamteh in ama tungtawnin Pasian kiangah thu angetsak nangin huhna ngen uh hi. Zita luang pen ama Missa kah denna biakinn ahi, St. Frediano ah vui uh hi. Misiangtho Zita pen innteng (inn nasemte) ahuh Misiangtho in ki ciamteh hi.
Misiangtho Zita aw…Ko te adingin thu hong ngetsak tan.