Homily By Rev. Fr. Joseph Zo Mung (April 22, 2022)

Jn 21: 1 - 14
Christu sungah kong it thuzui nulehpa ulehnau te, tuni Lungdamna Laisiangtho sungah Peter makai in nungzuipi te in ngasa a siahna thu I mu hi.
Zan thapaai ngasa asiah uh hangin bang mah ngah lo uh aa, a zingsang ciangin a ngunkuang gei uh ah Topa Jesu na om hi. Amaute in Topa Jesu ahih lam thei lo uh hi. Topa Jesu in ka ta te aw ngasa na man uh hiam ci-in a dot ciangin ka man kei uh hi ci uh aa, Topa Jesu in taklam ah na ngen uh paai un a cih ciangin amaute in Topa Jesu ahih lam thei kei mahtaleh ama cih bangin angen uh a paih ciangin ngasa tampi man uh hi. Tua ciangin nungzuipi John in Topa Jesu ahih lam thei aa Peter kiangah gen hi. Tua ciangin Peter zong a puan silh in Topa Jesu lam ah pai hi.
Nungzuipite in Topa Jesu a thawhkik khit ciangin amaute kiangah a pai hangin Topa Jesu ahih lam thei pak pah lo uh hi. Tuni tawh nungzuipi te kiangah Topa Jesu a kilah a thum vei na hi. Bang hangin hi bangin kilak hiam cih leh nungzuipi te in Topa Jesu sihna pan a thawhkik ding pen um pha lo ahih hang hi. Topa Jesu in na lamdang a lah ciang bekin um pan uh hi.
Hih Laisiangtho in eite bang hong gen nuam hiam cih leh nungzuipi te in amau leh amau in ngasa man thei hi mahtaleh khat zong manlo hi. Ahi zongin Topa Jesu sawlna amang ciangin ngasa tampi man pan uh hi. Tua mah bangin eite in zong khat veivei ciangin ei ii pilna, siamna, hatna, thunget zawh man hang bekin angah kisa in Pasian vangliatna ki phawk kha lo thei hi. A thokik Topa ii vangliatna te pen haksatna I tuak ciangin ki tel semsem hi. Mihing hatna tawh bangmah hih zo nawn kei ning I cih ciangin Pasian vangliatna ki tel pan hi.
Tulaitak aa thunget hat mahmah khat kiangah dong leng zong ka thunget man a ka ngah hi ci-in teci a pang zong tampi om kha ding hi. Pasian in hong it man aa hong piak hi ki ci kha lo thei hi. Tua ahih manin Pasian in amah I tel semsem na dingin haksatna I thuak ciangin, I cihmawh ciangin Pasian vangliatna I muang pan ding hi. I lametna a bei ciangin Pasian vangliatna hong kilangh pan dinga, tua ciangin kei thungetna, kei pilna, kei siamna hang tawh ka ngah hilo aa, Pasian hong hehpihman, hong it man a ka ngah hi ci-in I tel pan ding hi.
Tua ahih manin eite in haksatna te I tuak ciangin Pasian vangliatna te hong kilangh semsem ding hi cih phawkin I upna te khangsak ni. Thunget hanciam ni. Ahi zongin I nget zawh hang tawh a kingah ding hi lo aa, I nget ciangin Pasian hehpihna tawh upna tak tawh a ki ngah pan ding ahi hi. Ei leh ei ki muanna a bei sitset ciangin I thungetna zong pen upna tak tawh a kingen pan ding hi. Leitung ah muan ding I neih nawn loh ciangin, ei hong huh ding a om nawnloh ciangin eite tungah Pasian vangliatna hong kilangh pan ding hi.
Tuni nungzuipi te in amaute’ lametna, hih zawhna a bei ciang bekin Pasian vangliatna amuh pan aa, a tho kik Topa taktak hi cih a phawk mah bang un, eite in zong I nuntakna sungah I ngah thupha te, a thokik Topa hong piak hi, Pasian vangliatna hi cih I phawk zawh nang hanciam ni.