Catholic Nisim Lungdamna Laisiangtho. Jn 8: 12 - 20 (April 4. 2022)

12. Khatvei Jesu in mihonpite’ kiangah, “Keimah in leitung’ khuavak ka hi hi. Ka nung hong zui peuhmah khuamial lakah pai loin nuntakna khuavak a ngah ding hi,” a ci hi.

13. Tua ciangin Pharisee-te in Jesu’ kiangah, “Nangmah in nangma aadingin teci na pang hi. Na teci panna man lo hi,” a ci uh hi.

14. Jesu in, “Keimah in keima thu teci ka pan’ hangin ka teci panna a man hi. Bang hang hiam cih leh, keimah in koi lam pan hong pai a, koi lamah pai ding, cih ka kithei hi. Note in na hih uh leh, koi lam pan kei hong pai a, koi lamah pai ding, cih na thei kei uh hi.

15. Note in mihing’ deihna bangin thu na khen uh a, keimah in kuamah thu ka khen kei hi.

16. Keimah in thu ka khen zongin ka thukhenna a man hi. Bang hang hiam cih leh, keimah guak ka hi kei hi; kei hong sawlpa tawh thu ka khen khawm uh hi.

17. Note’ Thukham sungah, ‘Mi nih in teci a pan nak leh thuman ahi hi,’ ci-in kigelh hi.

18. Keimah in keima aading teci ka pang hi. A hong sawl Pa in keima aading teci a pang hi,” ci-in a dawng hi.

19. Tua ciangin amaute in, “Na Pa koi-ah om ahi hiam?” ci-in a dong uh hi. Jesu in, “Note in kei ka hi a, ka Pa ahi zongin nong thei kei uh hi. Kei nong theih uh leh, ka Pa zong na thei ding uh hi,” ci-in a dawngkik hi.

20. Amah in hih thute biakinnpi sung van mangpha kholna munah thu a hilh laitak a, a gen ahi hi. Ama hun tung nai lo ahih manin kuamah in amah man lo uh hi.