Lent (Zehtan hun)

Lent
*****
Asiangtho Zehtan hun sungah a hoih pen in I kiginkholh zawh na dingin L-E-N-T cih kammal lungngai ni.
L= Learning from God (Pasian kiang pan sinna)
- “Kei mah in itna ka hi hi” aci Pasian kiang pan itna, hehpihna te sin ding kisam hi.
- Ei hong ko sia te, hong simmawhte maisak zawh nang, thuakzawhna hong lak Topa Jesu kiang pan sin ni.
- Thuman thutak, a siangtho nuntakna tawh a nungta Topa Jesu kiang pan a siangtho nuntakna sin ni.
- Mawhna khialhna te tawh ki pelhin a Pa Pasian thu a mang tawntung, tapa Pasian kiang pan thumanna, siangthona leh thumangna te sin ni.
- Gentheih haksatna te tawh ki tuah hangin lungkia lo-in mainawt zawhna lungsim sin ni.
- Ama nuntakna a piakkhiat dongin leitung mite ading a ki piakhia lungsim Topa Jesu kiangah sin ni.

E= Empty yourself (Ei leh ei bangmah I hih lohna)

Ei ii nuntakna sungah si leh sa deihgawhna te ahi, numei leh pasal mawhna, gamtat siatna, hazatna, heh na, huaihamna leh zu leh sa tawh ki diahna te tawh kidim den lehang, Pasian hoihna phatna te leh thupha te hong lut nading mun omlo ding hi. Tua ahih manin hih Zehtan hun sungah ei ii lungsim deihna te nial in Pasian hoihna phatna te leh thupha te hong lut nading mun pia ciatni.

N = Nourish with spiritual food (Kha an vakna)

Zentan hun sunga Pawlpi hilhna om mah bangin a thungetna, kidekna leh thupha bawlna te tawh I kha tha nosuah sak kik ni.
- Mawhsutna leh Siangtho Pumpi sann te hoih takin sanna tawh I kha an vak ni.
- Thupiak te zuihna, pawlpi hong hilhna te leh zuih ding thukhun te tawh ki tuakin nuntakna tawh I kha tha hat sak ni.
- Lai Siangtho simna, lungngaihna leh nuntak pih kawmin Pasian hong piak kha an tawh kivak ciat ni.
-
T = Trust in God (Pasian tungah upna)

- Na khempeuh piangsak in khat bek aneih sun a tapa pen leitung mite hotkhiatna ngah nangin hong pai sak Pa Pasian um in muang in.
- Mawhna sungah kidiah in a om, eite hong et ngam loh manin leitung ah hong kum sukin gentheihna thuakin, a nuntakna a piakhia, sihna zo in a thawh kik na tawh hong tankhia tapa Pasian um in muang in.
- Nuntakna thak leh thumanna thupha, kha nuntakna gah hong gah sak Kha Siangtho Pasian um in muangin.
- Pasian ii hong hilhna leh thukham te in thuman nuntakna ah hong puak hi cih um in muangin.
- Pasian thupha leh hoihna phatna, siangtho na, itna leh hehpihna te um in muang in.
- Pasian’ hong puak ding hotkhiatna thu um in muang in.