Homily By Rev. Fr. Joseph Zo Mung (Feb 27.2022, Sun)

Lk 6: 39-45
Tuni I zak Lungdamna Lai Siangtho sungah mittaw leh mittaw lam ki hilh leh a nih un dum sungah kia ding hi cih thu ahi zongin, a nungzuite in a siapa sangin lian zaw ngeilo hi cih thu leh midangte mit sunga ninthem laksak nuam napi, ei ii mit sunga singluang om pen ki mu kha lo hi cih thu te Topa Jesu in a nungzuite gentehna tawh na gen hi. Hi thu ih et ciangin leitung ah midangte mawhna zon ding pen baih kisa mahmah hi cih thu I mu thei hi.
Tua hi aa, ei sep loh peuhpeuh, midangte sep peuhpeuh ki hawmthawh in ahoihlohna genin tua tawh nuam asa mi tampi ki om hi. Ahi zongin ei din mun I zo hiam I zo kei hiam cih I kisit tel ding haksa kisa mahmah aa, mite in a mau vaipuak zo maw zo lo cih I gen ding baih sa na pi hangin ei aa pen kua man ki genkhia lo hi. I mawhna I khialhna I pulak ding pen hamsa kisa mahmah hi.
Tua ahih manin mite I makaih nop leh mite sangin I theih zawk kul aa, mite sangin I hanciam zawk kul aa, tua i makaih zawh na dingin Topa Jesu mahmah mite sang I neih zawk ding a kulna thu I mu hi.
Tua ahih manin eite in Pasian tawh kizop nading hong khak tan I mit tang sunga om, eite ii I muh theih loh ninthem te lungngai in, tua te pan I mawhna I khialhna lungsim te pan kisikkik in Pasian kiangah ki-ap ni. Ei leh ei I siangtho khit ciangin, I ki puahphat khit ciangin midangte puahpha lehang abanban in leitung ah hong nopci ding aa, I nasepna te hong tangtung in leitung ah anopci hong suak ding hi.
Tua ahih manin tuni akipan Topa Jesu hong hilh thu te phawkin, hih lungdamna thu te phawkin I nuntakna sungah ei leh ei kipuahpha in tua khit teh midang te I puahphat zawh nangin han ciamni. Tua banga I hih zawh nangin I biak Topa Pasian in ei mimal khat kim ciat tungah thupha hong pia ta hen.