Homily By Rev. Fr. David Lian (Feb 28.2022, Mon)

Mk 10: 17-27
Tuni Laisiangtho te lungngai lehang, Lai Siangtho masa sungah Misiangtho Peter in Pasian aphatna, Pasian a pahtawina, Pasian tungah lungdam akohna te khempeuh amahin Pasian sungah upna picingna te nei-in eite Pasian sungah I nuntak ding tha hong piakna te I mu thei hi.
Peter in Pasian aphatna, a pahtawina in bang hang hiam cih leh eite pen Pasian sungah Pasian hehpihna hangin atapa Topa Jesu in sihna thuak in eite in ama hehpihna hangin Pasian tanu tapa I suahna hangin Pasian a phatna thu I mu hi. Tuni in eite khempeuh zong Pasian tanu tapa I suak hi. Bang hang hiam cih leh eite in Pasian um in tuisawpna tawh Pasian tanu tapa te hi hangaa, Pasian gam, Pasian gamh aluah ding te I hi hi. Innkuan sungah nu le pa mun ala ding pen ta te mah ahih manin Pasian tanu tapa te ahi eite khempeuh zong nikhat ni ciangin Pasian tawh nuamsa ding, Pasian nuntakna te angah ding I hih manin eite khempeuh in zong Misiangtho Peter bangin Pasian phat thei in Pasian tungah a lungdamko thei te I hih ding thupi hi. Eite in ze-et na, haksatna te I tuak zongin nungzuipi te bangin I upna te khahsuah lo a, Pasian sungah I nuntak zawh nading tha la ciatni.
Lungdamna Lai Siangtho sungah mikhat Topa kiangah hong pai-in sia hoihpa aw, nuntak tawntungna ngah theih na dingin bang sem ding ka hi hiam ci-in dong hi. Topa Jesu in bang hangin sia hoih hong ci na hi hiam? Pasian logal leitungah a hoih omlo hi ci hi. Tua khit ciangin Pasian thukham te na zui-in ci-in na gen hi. Tua ciangin mipa in tua thukham te ka neu tung pek pan ka zuihsa hi ci-in dawng kik hi. Tua ciangin Topa Jesu in tua mipa it in hoih tak in en in nangin na kisap khat om lai hi. Pai-inla na neihsa na te zuakin, na ngah sum te mizawngte pia in, tua hi leh vantung gam ah na manpha tampi na nei ding hi. Tua khit ciangin ka nung hong zui-in ci-in gen hi. Hih mipa in Topa Jesu thu gen a zak tak ciangin maitai nawnlo in paikhia hi.
Tua khit ciangin nungzuite in Topa Jesu kiangah tua hih leh mite hotkhiatna ngah nading koi ci hih ding I hi hiam? Haksa mahmah ding hilo ahi hiam? Koi ci bangin gupkhiatna ki ngah thei ding hiam ci-in dong uh hi. Bang hang hiam cih leh mihau te pen gupkhiatna angah ding haksa mahmah hi. Tua sangin Kalaoh khat phim bilvang ah khum ding a baihzaw hi ci-in na gen lai ahih man ahi hi.
Nungzuite in hi bangin a dot ciangin Topa Jesu in hi mah hi. Mihing te ading apiang thei bangmah omlo hi. Ahih hangin Pasian tawh hi leh a piang theilo bangmah omlo hi ci-in na gen hi. Hi lai ah bang thupi sa ka hiam cih leh mikhat in Topa Jesu kiangah hong pai-in nuntak tawntung na ka ngah nading bang hih ding ka hi hiam ci hi. Lai Siangtho siamte hi ta leh, Pharisee te hi ta leh anget uh ki bang lo hi. Amaute in Topa Jesu a thangsiah nading in amatnop manin thu dotna na nei uh hi. Mipite hi leh amau nopsak nading, cidam nading, a kisapna te ngetna te I mu hi. Hi mipa in nuntak tawntungna ngah na dingin bang hih ding ka hiam ci-in na dong hi. Tua ciangin Topa Jesu in sia hoih pa aw, nong cih Pasian logal a hoih kuamah omlo hi ci hi. Tua in Topa Jesu pen Pasian ahihna hong kilangh sak hi. Ahih hangin hi mipa bang hangin Topa Jesu in thu agen khit ciangin paikhia ahi hiam? Topa Jesu pen Pasian taktak hi cih um zo nailo hi cih ki mu thei hi.
Tua hi aa, eite in Topa Jesu pen Pasian taktak hi cih upna kip I neih masak ding kisam hi. Na dang khempeuh sangin Pasian it zaw lehang Topa Jesu pen a tawp dongin zui zo ding hi hang cih ka mu thei hi. Hi mipa in Pasian thukham te zui zo khin aa, aneihsa te a zuak sak ciangin paikhia hi. Eite zong Pasian thukham te I zui zo khin hiam? Hoih tak kisit tel lehang hi mipa sangin eite niam zawlai, ki zui zolo lai, ki hoih zo lo zaw lai hi cih kimu kha thei ding hi hang.
Misiangtho Peter in upna I neih nading tha hong piak mah bangin eite in Topa Jesu pen Pasian taktak hi cih um in a nung a zuite I hih ding han ciam ni. Tua hi leh Pasian hong piak ding vangliatna te nikhat ni ciangin ngah ding hi hang.