Homily By Rev. Fr. Paulinus Muan Lian (Feb 26.2022, Sat)

Mk 10: 13-16
Tuni Lungdamna Lai Siangtho sungah Topa Jesu in Pasian gam pen eite in koici bangin sangding cih, naupangnote thu tawh gentehna in hong hilh cian hi.
Naupangte ka kiangah hong paisak un. Kham kei un ci-in Topa Jesu in anungzuipi te kiangah na gen hi. Jesu in naupangte ama kiangah a pai ciangin thupha pia hi. Hi te in bang hong lak hiam cih leh Topa Jesu in ei mihingte hong itna hong lahna ahi hi. Nungzuipi te in hi naupangte bang hangin kham hiam cih leh Topa Jesu ii Pasian thu tangko na ah naupangte in a nawngkaaisak ding deihlo ahih manin a kham uh ahi hi. Ahi zongin Topa Jesu in naupangte ama kiangah sam kik veve hi.
Naupangte in Topa Jesu kiangah amau thu tawh hong pai hilo uh aa, Pasian thu ngai ahong pai a nu apa te uh tawh hong tonkhawm ahi uh hi. Tua Nuleh Pa te in anaupangte uh Topa Jesu thupha piasak nuam uh ahih manin hong paipih uh ahi hi. Tua thu panin ei Christian te in bang la ding I hiam cih leh Nu leh Pa te in I ta te Pasian kiang pan thupha asang theih nading un, aneu a kipan Biakinn ah tonpihin, Pasian tawh a ki nai semsem nading Pasian thu te hilh in Pasian thu leh la tawh a khan theih na ding un I hilh ding pen ei tavuan hi cih I phawk ding kisam hi.
Naupangte in alungsim sung uh ah deidanna neilo uh hi, nu leh pa zong khen lo hi. Minam beh thu tawh zong kikhen lo uh hi. Azawng ahau cih lungsim zong neilo uh hi. Tua ahih manin tuni Topa Jesu in Pasian gam koi ci ngah ding I hiam cih naupangte tawh hong genteh ahi hi. Eite in naupangte lungsim bang nei-in Pawlpi sungah, innkuan sungah, I veng sungah ki deidanna neilo in, I vekpi in Pasian tanu tapa te, Pasian maiah a kibang vive hi hang cih lungsim I neih ding Topa in eite khat ciat hong deih hi.
Eite in Pasian deihna tawh kituak in a nungta nailo, naupangte bang lungsim anei nailo te, eite sungah, I khua I tui ah, I veng I paam ah a om khak zenzen leh eite in tua te Pasian thu hilhin van gam I ngah nading koi ci bangin nungta ding cih te I hilh ding kisam hi.
Tuni Lai Siangtho masa ah Misiangtho James in “Sanggam te aw, note lakah khat peuh, thuman thutak pan lampial kha in mikhat peuh in amah thuman thutak lamah hong ki hei kik sak leh mawhnei mi khat, a lampialna pan in a ki hei kik sak mi peuhmah in tua mi Kha sihna panin honkhia in mawhna tampi a mai na dingin na asem ahihna thu ki phawk ta hen” ci-in ong hanthawn hi.
Tua ahih manin eite in ei leh ei ki en kik in naupang lungsim I cih, Topa Jesu ii deih lungsim tawh Christian nuntakna tawh ki tuak aa, I kampauna, I lu hekna, I gamtatna te tawh mite Pasian thu alak zo te I suahzawh na dingin Topa Pasian in khat ciat thupha hong pia ta hen.