Homily By Rev. Fr. Paul Muan Lian (Feb 25.2.2022, Fri)

Mk 10: 1 – 12
Tuni Lungdamna Lai Siangtho sungah Topa Jesu in nupa kal sungah ki-itna, kilemna a om theih nading, Pasian gawmsa na te kuamah in a khen loh nading, nupa ki khenna te in Pasian deihna tawh kilehbulh hi, Pasian in deihlo hi cih thu tel takin hong gen hi.
Nupa I cihte in a ki-it man uh aa a kiteengte, a om khawm te hi. A ki-it man un kiciamna a bawl uh ahi hi. Ahi zongin bang hangin I kiim I paam ah nupa kitawng, kikhen, innkuan ki lemlo om veve ahi hiam? Pawlpi in Pasian gawmsa nate kuamah in khen thei lo hi ci-in hong hilh hi. Nupa ki khente I et tak ciangin amaute ii deihna, amaute ii theih na te bek athupisak tak uh ciangin innkuan sung, nupa kal sungah siatna tampi piang thei hi ci hi.
Tua banah nupa ki khen ding sangin kilemkik nading bang hangin ki zong masa lo ahi hiam? Bang hangin itna lah nading lampite zong masa lo ahi hiam? Bang hangin tua kiteen a kipsak thei, thupha apia thei Topa kiangah zuan masalo ahi hiam cih ngaihsut huai mahmah hi. Tua kiteen na akip akho nading Topa’n adeih lam tuni tel takin hong gen hi.
Kiteenna ah paubanna omlo cih omlo hi. Mihing I hih manin amawh thei, akhial thei, thanemna anei mi vive I hi hi. Tua kicinglohna te, thanemna te thuak siamin, bangzahte in haksatna te om mahtaleh tua itna, ki ciamna te a kipsak, akhosak te I hih ding Topa’n hong deih hi.
Lai Siangtho I ettak ciangin Lai Siangtho sungah Pasian in mihingte hong itna te a kigelh ahi hi. A kipatcil pankipan Pasian in mihingte tawh kizom nuam ahih manin mihingte hong bawl hi. Mihingte nek leh dawn ding Singkung, Lopa te ahi zongin, Ganhingte ahi zongin hong bawlsak hi. Leitung bei dong amah tawh I kizop theih na dingin aman vaihawm hi. Tua bek thamlo in tawntung nopsakna ah amah tawh I omkhop ding zong Pasian in hong vaihawm tawntung hi. Ei mihingte in lampial in mundangah I taisat hangin Topa in a tawntung in ama itna, cihtakna hong lak tawntung hi.
I nuntakna sungah kiniamkhiatna te I neihloh tak ciangin, I nuntakna sungah Pasian I ki-uksak loh tak ciangin, innkuan thunget khopna, khikhin khopna, Laisiangtho sim khopna te I neihloh tak ciangin innkuan sungah kitotna, kiselna, ki khenthangna te piangsak thei hi cih tuni I phawk ding ahi hi.
Misiangtho Mother Theresa in “Lei tungah kilem ding nadeih leh na innkuanpih te na it in” ci hi. Tua ahih manin eite in I innkuan sungah khat leh khat ki-it na tawh, khat leh khat mawhnate kimaisakna tawh, khat leh khat I ki telsiamna tawh, khat ii thanemna te kiniamkhiatna tawh kisansiamna tawh ka mawhna hong maisak in ahi zongin, na mawhna kong maisak hi ahi zongin khat leh khat ki thumna, mawh ki maisakna te I neihna tawh innkuan sungah ki-it kilemna te nei-in, tua ki-itna in I kiim I paam ah kilemna a khangkhiasak te I hih ding tuni Topa in eite khat ciat hong deih hi.
Tua ahih manin eite in Pasian gawmsa na te a khen I hih loh nading, akipsak, a khosak te I hih zawh nading, Pasian a cihtak mah bangin eite zong cihtakna, itna kip, itna kho a nei te I hih theih nading a kisam thupha te Topa in eite khat ciat hong pia ta hen.