Homily By Rev. Fr. Joseph Zo Mung (Jan 31.2022, Mon)

Mk 5: 1-20 Tuni Lungdamna Laisiangtho sungah damna angah mipa in Topa Jesu kiangah na nung hong zui sakin, hong zui nuam ing a cih ciangin Topa Jesu in na lawmte kiangah na om inla, Pasian in nang bangzah takin hong it cih thu na hilh in ci-in vaikha hi.

Ahi zongin ama nungzui ding te pen ka nung hong zui-in ci-in sam pah hi. Tua ahih manin Pasian nasepna pen nam tampi om aa, tuisawp ding, a nungzuipite a teel tuam ahi hi. Hih damna a ngahpa pen ama nung zui nuam hi mahtaleh zui sak lo aa, Pasian itna thu na lawmte kiangah tangko in ci-in vaikha hi. Eite zong Christian I suah ciangin Pasian in eite bangzah in hong it hiam cih mite tungah I tangko ding vaipuak I nei hi.

Ahi zongin tuisawpna piak theihna, thu neihna pen a nungzuipite tung bek ah pia hi. Mikim tungah na pia lo hi. Tua ahih manin tuisawpna I ngah ciangin I sep I bawl dingin Pasian thu tangko ding hi. Tua khit ciangin a banban in Sacramentu thupha sanna, nam (7) te a pia thei ding te leh a sang ding te zong Pasian in teel tuam hong nei aa, Siampi dingin a teel tuam mi leh a teel loh mi zong om hi cih hi Laisiangtho in hong thei sak hi.

Tua a hih manin Topa Jesu ii mission in dawi te hawlkhiat ding, mihingte leh dawi te ki khen sak ding, mihing te leh Pasian om khawm ding cih hong deih hi cih phawkin I lungsim sungah Topa Jesu omsak in, Topa Jesu ei sungah a om lam zong phawk lehang dawi te I zo ding hi.

Tua bek thamlo in Pasian in eite bangzah in hong it hiam cih mite tungah I tangko ding zong kisam aa, mihing veve sung pan in zong ama nungzui dingin a teel tuam om hi cih zong I phawk ding kong deih hi. Tua hi aa, hi lungdamna thu te phawkin I nuntakna sungah Topa Jesu deihna bangin I gamtat zawh nang, ei hong teelna mun ciatciat tawh ki tuakin Pasian na hoih takin I sep zawh nang hanciam ciatni.