Homily By Rev. Fr. Raphael Khup pi (Jan 29.2022, Sat)

Mk 4: 35-41 Tuni Lungdamna Laisiangtho in Topa Jesu a nungzuipi te tawh Gungal khatah kah dingin Gunkuangah tungah a tuangna thu ahi hi. Tua bangin khual azin laitakun amau lamet lohpi in zankiimpi in huihpi hong nungin tuihual hong kilok tak ciangin Gunkuang tunga om nungzuipite hitaleh, a dang gunkuang tunga om mite hitaleh lau-in patau mahmah uh hi. Tua ciangin amaute in Topa Jesu phongin sia aw, ko te a kisiat dinguh phamawh sa lo na hi hiam ci-in ko uh hi. Jesu zong tho in huihpi leh tuihualte dai-in ci-in kamkhat tawh thu a piak tak ciangin hong daipah takpi hi. Jesu in amaute kiangah bang hangin note lau na hi uh hiam? Upna neilo na hi uh hiam ci-in thu na hilh kik pah hi. Ih leitung nuntakna in nungzuipite mah bangin Gunkuang tawh gal khat lamah kahin khual a zin te I hi hi. Hi bangin khual I zinna munah eite in bang tawh kituak ding cih I gen thei kei hi. Ahi zongin leitung ah om I hih mah bangin hi te tawh I kipelh thei kei ding hi. Munkhat teitei ah khat vei teitei I tuahkhak ding ahi hi. Hi bangin haksatna te tuihual bangin I tuah tak ciangin Topa Jesu sam in, Topa Jesu kiangah ki ko in Topa aw, bang hangin hizahin gim hong thuaksak na hi hiam ci-in I ki ko thei kha ding hi. Tua hun ciangin Topa Jesu in a nungzuipite kiangah a cih bangin bang hangin lau na hiam ka ta aw, upna nei lo na hi hiam ci-in hong tai kha ding hi. Eite in I muang I suan ding om lo I sa kha thei zel hi. Ahi zongin Topa in eite tawh khual hong zinkhop lam I phawk ding tuni ka deih hi. Eite in upna neilo te bangin laulawng patau in I om khak leh Topa in eite tungah taina kammal hong zang ding hi. Ahi zongin upna tawh eite Topa kiangah I ki ko nak leh I kisap hunah Topa in hong huh ding hi. Kei kiangah hong pai un, kei hong beel un ci-in Topa in hong sam hi. Tua ahih manin Topa Jesu kammal te I lungtang sungah a thakin guangkik ni. Nungzuipite tawh a tonkhawm Topa in eite tawh zong hong tonkhawm hi. Galkhat lamah amah tawh tonkhawm denin eite ii lametna mun lungmuang takin I tun theih na dingin tha la-in ama tungah ki-ap tawntung ni.