Homily By Rev. Fr. Titus Khanno (Jan 27.2022, Thur)

Mk 4: 21-25
Tuni I lungngaih ding, I bulphuh dingin na neih lian pen ahoih pen piakhia in, tua hi leh ahoih pen leh a lian pen nang tungah ong kipia tuah ding hi cih bulphuh nuam hang.
Laisiangtho sungah Abraham tangthu I et ciangin amah in a zi Sarah kiangah I zinpa adingin I gankhawite lak pan a hoih pen, alimci pen manin gawhni ci-in a zi sawl hi. Tua ciangin a zi in zong gan thau pen go in tua tawh a zinpa uh lengla na do hi. Tua bangin amaute thupha bawlna hangin Pasian in amaute ta hong guan hi. Hih tangthu I et tak ciangin Abraham in Pasian adingin a limci pen piakhia hi cih I mu hi.
Moses zong pilna siamna zong nei lo-in, tuu cingin a om laitak in Pasian in asap ciangin ka aw zong sianglo pi-in bang ci bangin Israel mite ken honkhia zo ding ka hi hiam ci-in amah in Pasian tungah dotna hong nei hi. Ahi zongin Pasian in amah muangin a sawl ciangin Moses paikhia in Egypt gam a om Israel mite pen ciangkhut khat tawh Pasian in na lamdang lakin hong honkhia zo hi. Cannan gam ong zuatpih zo hi. Tua mun I et tak ciangin Moses in ama pilna, siamna, hatna tawh hi lo-in Pasian sawlna tawh a hih zawhloh ding nangawn upna tawh ong sem khia, ong kipiakhia ahih manin minamte in koltanna pan suahtakna ngah uh hi.
Tua ahih manin tuni Lungdamna Laisiangtho sungah I meivakte lawh khuh ding I hi hiam? Lupna nuai ah koih ding I hi hiam? Eite in Pasian hong piaksa, I hihna bangbang, I nuntakna tawh Pasian nasem khia lehang, piakhia lehang eite tungah Pasian in thupha hong pia kik hi zaw hi ci-in I phawk ding hong hilh hi.
Pasian in khat leh khat ong thupha piak ki bang lo-in pawlkhat te hauhna, sum leh paai pia hi. Pawl khat te pilna pia in pawlkhat te siamna tuamtuam pia hi. Pawlkhat te in piak ding zong nei lo-in zawngkhal in ki om hi. Ahi zongin I hihna bangbang tawh Pasian na I sep khiat dingin Topa’n hong deih hi. Eite piakkhiatna sangin a tamzaw Topa’n hong pia kik ding hi.
I lungsim tawng ah lungsim hoih lungsimpha I neih ding Topa’ hong deih hi. Tua te I neih tak ciang bekin I meivak te kivak thei pan ding hi. I mei ong tang thei pan ding hi. I ci ong al pan ding hi. Khua ong kimu thei pan ding hi.
Tua ahih manin eite in I sepkhiatna, I piakkhiatna te bek hi lo-in Pasian kammal zong nisim, naisim in I sim ding, I ngaih ding kisam hi. Ei pen thu I nget ciangin Pasian kiangah angen I hi hi. Ahi zongin Laisiangtho I sim ciangin Pasian in eite thu hong gen hizaw hi. Tua ahih manin Laisiangtho tawh Pasian thu gente ngai in limtak hoihtak, damtak in Laisiangtho sim in tha I lak ding, tua in I namgimtui ahi hi.