Homily By Rev. Fr. John Mang (Jan 26.2022, Wed)

Lk 10 : 1 – 9
Tuni Lungdamna Laisiangtho sungah Topa Jesu in lungdamna thu a tangko dingin nungzuipi (12) te a sawlkhiat banah (72) te teel tuam, seh tuamin ama pai nading mun te ah ama paima in sawl khia hi, kuan sak hi cih I mu hi.
Topa Jesu in amaute a sawlkhiat ciangin an lak ding tam hi, lo nei pa kiangah anla nasem ding tampitak hong sawl na dingin thungen un ci-in amaute na vaikhak hi. Tua bek thamlo in a pet thei, ane thei, a susia thei Ngia honte lak ah bangmah a bawl theilo, muan ding suan ding dang aneilo Tuuno bangin note kong sawl khia hi na ci hi.
Eite sungah zong Pasian thu tangko na ah Ngia bangin lungsim kawi-in asusia thei ki tuak kha thei ding hi. Ahi zongin tua te kawmkal ah tuuno bangin lungduai in, lungnem in, thuman in citak in tua nuntakna tawh lungdamna thu a tangko dingin Topa’ hong deih hi cih zong I phawk dingin I deih hi.
Tua khit banah sum keng lo ding, ip pua lo ding, khedap a val pua lo ding hi ci-in vaikhak hi. Tua in bang hong phawk sak hiam cih leh Pasian thu tangko na ah hong nawngkaai sak thei in sum leh paai, neih leh lam, min leh za te in zong I nasepna hong nawngkaisak thei hi. Tua te lunggulh luatna, deih luatna te leh sum leh paai, min leh za, neih leh lam te a dingin nasepna te in lungdamna thu tangko na te sungah dongkholhna te suak thei hi cih zong hong phawksak ahi hi.
Tua banah a kisamlo pi-in lam kaal ah mi tawh ki ho ho lo ding hi. Zin tunna laih laih lo ding hi cih bangin Topa in amaute vaikhak hi. Tua in lungdamna thu tangkona te ah mi khat leh khat kibanglo hi. Azawng ahau om ding hi, a pil a siam om ding hi, neih leh lam a kicing zawdeuh om ding hi, a hamsa zong om ding hi. Ahi zongin tua te khempeuh tungah a kibangin I nuntakpih khop ding Topa’ hong deih hi cih zong hong thei sak lailai ahi hi.
Lungdamna thu tangkona te sungah gentheih haksatna te zong om ding hi. Ahi zongin tua te kawmkal ah kiniamkhiatna leh thuakzawhhatna tawh nasepna tungtawnin Topa’n gualzawhna hong ngahsak ding hi cih zong hong thei sak hi.
Tuni (72) te a kuankhiatsak mah bangin Topa’n nang leh kei zong hong sawlkhia hi. Hong kuankhiasak nuam hi. Tuisawpna Sacramentu I san laitakin Siampipa in kam leh bilte thupha hong piaksak hi. Banghang hiam cih leh lungdamna thu I bil mahmah tawh za in, I kam mahmah tawh tua lungdamna thu tangko ding, genkhia ding, sawlkhiatna, kuansakna cih hong theisak ahi hi. Tua ahih manin tuisawpna I ngah ni pankipan kam leh bil te zangin Pasian gam adingin anungta, anasem ding a kuan khia dingin hong kisawlkhia khin hi cih a thakin i phawk ding I deih hi.
Misiangtho Pawl in “A tangko, agenkhia om kei leh kuan lungdamna thu za thei ding hiam” na ci hi. Nisim hitaleh Nipini sim in hitaleh I kikhop aa, thu I nget ciang Pasian hong teel nang thu I ngen den hi. Tuni kei mahmah hong teel in, hong sawl in I cih theih ding Laisiangtho in hong theisak mahmah hi. Pasian in kamsangpa Samuel a na hopih lai-in Samuel in ka za hi Topa aw, na nasempa hong sawl in na ci hi.
Tua ahih manin Topa’n nang leh kei hong deih hi. Hong zang nuam hi. Ama gam leh lei aphut dingin, lungdamna thu a tangko dingin hong deih hi. Hong zawn hi. Tua ahih manin I nisim nuntakna te sungah mitampitak te ii bil ah tua lungdamna thu a tangko dingin Topa’n nasem dingin nang leh kei hong zawn hi. Tua ahih manin Pasian hong sapna, Pasian deihna te sungah a kipiakhia zo Christian te I suahzawh nangin hanciam ciatni.