Homily By Rev. Fr. Daniel Mung (Jan 25.2022, Tue)

Mk 16: 15-18
January 25 ni pen Misiangtho Paul kikhelna pawini ahi hi. Lungdamna Laisiangtho sungah note leitung mun khempeuhah pai-in lungdamna thu tangko un ci-in I za hi.
Mihing I hih mah bangin eite in thupha I kisam hi. Pasian in thupha hong pia kei leh eite in bangmah I hih zo kei ding hi. I nisim nuntakna sungah thupha I ngah na dingin hong khaktan thei a diakdiak in mawhna ahi hi. (Late 51: 5) na ah “A khialsa mah in kei ka suakkhia aa, ka nu’ hong paai cil akipan amawhsa ka hi hi” a cih mah bangin I nu’ gilsungah I om laitak panin mimawh mikhial I hi hi.
Ahi zongin Pasian in hong it in I mawhna pan I suahtak nading, tuni lungdamna Laisiangtho sungah I zak mah bangin Topa Jesu in nungzuipite vaikha hi. “Note leitung khempeuh ah pai kawikawi unla, lungdamna thu tangko un. Mi khempeuh keima nungzui suaksak unla, Pa min, Tapa min, Khasiangtho min tawh tuisawpna na pia un” a cih mah bangin mawhna pan I suahtak nading eite in tuisawpna Sacramentu I sang hi.
Tuisawpna Sacramentu I san khit the siangtho in Pasian tanu tapa te suakin Pasian gamluahza I ngah hi. Eite in mihing I hih mah bangin mawhna khialhna I bawl thei pahpah hi. Mawhna khialhna I bawl khak hang, Misiangtho Paul mah bangin I kisikkik theih ding nakpi takin thupi hi. Mawhna I neih hang Topa Jesu in hong it hi. Tuni in mawhna te kisikkik in leitung thupha vantung thupha I ngah nading hong khaktan ahi, I mawhna te I lungsim takpi tawh kisikkik in Pasian kiang I zuat ding tuni in Pasian in eite hun hoih hunpha hong pia lai hi.
I lungsimte puahpha in Misiangtho Paul mah bangin I mawhnate kisikkik in leitung thupha vantung thupha te, pi leh pu, nu le pa thupha te ngahin, akhang akhangin thupha I ngah nading I nisim nuntakna ah kigingkhol tawntung in ei hanciamzawh bangin hanciamin Topa deihna bangin I kalsuanzawh nangin hanciam ciatni.