Homily By Rev. Fr. David Lian (Jan 24.2022, Mon)

Mk 3: 22-30
Tuni I sim Pasian kammal te in bang hong hilh nuam hiam cih leh thuman te thuman banga mu aa, thuman tawh I nuntak ding thu I mu thei hi. Tu laitak I gam sungah gam uliante ginatlohna hangin gammi tampite in gimna haksatna tuakin om hi. Ahi zongin amaute in ahoihlo in gamta hinapi in ahoihloh lam ki mu thei lo-in ahoih mah kisasa mi tampi, Makai tampi om thei hi. Tuni in eite in ahoihte ahoih bangin mu aa, asiate asia bangin mu aa, asiate khel in ahoih in mailam ah I kalsuan tawntung zawh na dingin tha hong pia hi.
Laisiangtho sungah I muh mah bangin David kumpipa pen Pasian in ompih hi. Tua mah bangin eite zong Pasian ompih mi I hih ding kisam hi. I pilin I hau in, I siam zongin Pasian tawh I om khop kei leh lungnopna, picingna, mite itna te om thei tuanlo hi. Lungnopna man te, kilemna man te om theilo hi. Tua hih manin I nuntakna ah gamtatsia bawl I hiam, gamtatpha I bawl kha hiam tuni in kisittel in thanemna bangzahta I nei zongin Pasian tawh a omkhawm, Pasian kiang azuanzo te I hih ding a thupitna I mu thei hi.
Lungdamna Laisiangtho sungah Laisiangtho siamte in Topa Jesu nasepna te amuh ciangin amanin mu theilo in ahoihlo lam bekbek in a muhna thu I mu thei hi. Topa Jesu hi leitungah hong pai-in cinate damsak, mittawte khua mu sak, lampai theilo te lampai thei sakin mi tampi takin annek tuidawn na vak hi. Thupha tampi na bawlin vangliatna tampi na lak hi. Ahi zongin bangzah in hoihna phatna a bawl zongin ahoihlo lamin amu thukham hilh sia te, Laisiangtho siam te tampitak na om hi.
Eite in zong I lungsim sungah thuman deih, thuman kan nopna lungsim nei napi hangin eilehei kinial in thuman I san theih loh ciang, I mawhna te ki mu thei lo, I thanemna te ki mu theilo in, ahoih khempeuh asia in I muh ciangin tua in Khasiangtho tungah mawhna abawl te I hi hi. Khasiangtho Pasian in eite pen I mawhna te kisik thei aa, Pasian tungah kinga aa, thuman Pasian um aa, Pasian sungah I kalsuan ding ong deih hi.
Ahi zongin eite in ei leh ei kisang thei lo-in, ei leh ei aman pipi in kinial in, mawhneipi mawhnei lo-in kibawl in I om ciang tua in Pasian deihna tawh kituak lo hi. Tua ahih manin I nuntakna sungah thuman te thupi sa aa, thuman deihin, thuman tawh kalsuan aa, thuman tawh a nungta tawntung zo te I hih zawh na dingin hanciam ciatni.