Misiangtho Margaret of Hungary (Jan 18)

Misiangtho Margaret Hungary in Misiangtho Elizabeth Hungary ii tu nu ahi hi. Margaret in leitung kumpi innkuan ahih banah vantung a om Misiangtho Elizabeth tawh zong ki tanau lai hi. Amah in Pasian thu hanciam mahmah in mizawngte tungah hehpihna anei mahmah leh a huh den khat ahi hi.
Margaret in 1242 kumin suak a, Kumpi Bela IV ii ta (10) aneih lak pan a (9) na tanu ahi hi. 1241 kumin amau gamah Mongol te gamsim in apai ciangin, Margeret ii nulepa te in Mongol te khut sungpan a suahtak uh leh Margaret pen Pasian deihna bangin zui sak ding, Pasian kiangah ap ding ci-in Pasian tungah kiciam uh hi.
Tua ahih manin Margaret kum (4) aphak hunin Veszprem a om, St. Dominican zateih sangah puak uh hi. Kum (10) aphak ciangin Buda gei a om, a nu leh pa te phuat ahi A Siangtho Tonu Maria zateih sangah om sak leuleu uh hi. Tua mun pen tu in Margaret Island ci-in ki sam hi.
Kum (12) aphak ciangin nungak siangtho sin dingin Pre-Aspirant in om hi. Amah kumpi innkuan ahih hangin mite’ thupi bawl ding deihlo in nial den hi. Tua banah amah in mite sep noploh te teel in sem den hi. A Pa in Bohemia kumpi Orrokar II tawh gamvai tawh kisai in a kiteensak ding ahanciam hangin Margaret in tua te langpangin ama kum (18) in kiciamna nei hi. Apa’ gelna pan a kidal na dingin Margaret in alawm te tawh Pope ii phalna nangawn la hi.
Margaret in Pasian deihna zui-in, puan hoihlo te bek silhin a om bek thamlo, ling khedap bulhin mawhna dan lohna tuamtuam bawl hi. Tansat lo-in thungen in an tangin om hi. A diakdiak in amah leh amah a kinial na in kua ma sep noploh nasepte hanciam in sem hi. Tua bangin kidekna nasiatak in aneihna te hangin Margaret in 1271 kum, January (18) ni, ama kum (28) hun in si hi. 1943 kum, January (19) ni-in Misiangtho asuahna thu ki tangko hi.
Amah asih khit ciangin 1271 – 1276 kum sung, Misiangtho suahna kipsak na dingin ama kiangpan vangliatna (74) ki ngah hi. Vangliatna atamzaw pen natna te pan damna ngahna ahi hi. Tua banah ama huhna vangliatna hangin misisa khat nungta kik hi cih zong ki thei hi. Tua ahih manin natna satna te pan damsiangna I ngah kik zawh na dingin Misiangtho Margaret beelin thungen ni.
Misiangtho Margaret Hungary aw… Ko te adingin thu hong ngetsak tan.