Homily By Rev. Fr. David Sut Hau Lian (Jan 17. 2022, Mon)

Mk 2: 18-22
Topa Jesu in ei mihingte pen leitung an leh tui bek tawh anungta hilo in, Pasian thu tawh anungta hi zaw hi hong cih mah bangin eite khat ciat Pasian thu tawh tha kipia in, Pasian thu sungah I nuntak theih ciat na dingin hanciam ciat ding hihang ci-in kong zawn nuam hi.
Tuni Lungdamna Laisiangtho lungngai lehang, Pasian in eite pen ama thu I mang ding, ama thu ngai ding, ama deihna banga I gamtat ding hong deih hi cih thu ki mu thei hi.
Laisiangtho masa sungah kamsangpa Isaiah in kumpipa Saul kiangah Pasian deihna ama ading agenna thu I mu hi. Ahi zongin kumpipa Saul in Pasian deihna na mang lo-in, ama deihna bang bekin gamta ahih manin Samuel in Saul thu amang na te I mu hi. Samuel in Saul kiangah bangci hiam cih leh nang mah in Pasian hong sawl ahi, hih mawhnei mi te susia ding, mangthang sak dingin Pasian in hong sawl hi napi in bang hangin Pasian thu mang lo-in amaute’ nusiat uh ahi ganhingte manin biakpiakna in zang na hi hiam ci-in thu ahilhna te mu hi hang. Tua banah Samuel in Pasian thu mangna in meihal biakpiakna sangin manpha zaw hi ci-in na gen hi.
Tua ahih manin ei Christian thuzuite in zong Pasian thu sungah nungta a, Pasian thu tawh bangci ciangin kalsuan aa, Pasian thu ngai in koi ci dan in nungta I hiam cih I kisit ding thupi ka sa mahmah hi. Pasian deihna banga anungta te hi lehang, Pasian sungah nungta lehang, Pasian in thupha hong pia semsem ding hi.
Misiangtho Paul in hong hilh mah bangin adahte tawh dah khawm, anuamte tawh nuam khawm I hih mah bangin eite nisim nuntakna ah Pasian tawh omkhawm lehang, Pasian tawh nungta khawm lehang, Pasian tawh haksatna athuak khawm, Pasian tawh gualzawhna te angah khawm ding I hi hi. Tua ahih manin tuni I zak Pasian kammalte I nuntakna sungah nuntak pihin midangte tungah zong ahawmkhia zo, Pasian thu tawh a nungta zo semsem te I hih zawh na dingin hanciam ciatni.