Homily By Rev. Fr. Raphael Khuppi (Jan 16.2022, Sun)

Jn 2: 1-11
Mopawi na bawlsawm uh ciangin Topa Jesu leh Topa Maria sam hamtang un.
Tuni Lungdamna Laisiangtho in Topa Jesu in Cana mopawi ah na lamdang alahna hi. Na lamdang apiangtheih na dingin angetsak Tonu Maria zong nei I hih manin eite adingin a lungdam huai mahmah thu khat ahi hi.
Laisiangtho masa sungah Pasian in a mite a itna, ami Israel te in bangzah ta in amah nusia ta leh Pasian in a mite cikmah hunin nusia ngeilo hi, ompih tawntung hi, thuman thutak tawh ompih tawntung hi cih kamsangpa Isiah tungtawn in ki mu thei hi. Tangval khat in nungak khat a tenpih mah bangin Topa’n amite ompih hi, tenpih hi, a leitang thupha pia hi ci-in Isaiah in gen hi.
Laisiangtho nihna sungah Pasian in ei mimal khat ciat tungah ama ii Khasiangtho hong buaksuk in tua Khasiangtho tawh eite khat leh khat I kihuh diamdiam theih na ding cih ngimna tawh Khasiangtho hong pia hi cih I mu hi. Hongpiak Khasiangtho pen khat bek hi a, hong piakna ahang zong khat bek mah hi. Mitampi phattuam na dingin hong piak ahi hi. Khasiangtho gah, Khasiangtho thupha te khat leh khat ki banglo hi mah tase leh, asang mite zong kibanglo himah tase leh hong pia pa kibang hi, hong piakna hang kibang hi, na hoih sep na dingin hong piak ahihna thu Misiangtho Paul in hong gen hi.
Pasian in hong piak Khasiangtho thuphate eite in bangci bangin zang I hiam cih I lungngaih dingin thupi mahmah hi. Pilna, siamna, hauhna te ei guak adingin zah ding hi lo-in, mi tampi phattuam na dingin I zat ding Topa’n hong deih hi.
Lungdamna Laisiangtho sungah Topa Jesu in na lamdang alahna pen amah a kipholak nopman, ama minthan nop man bek hi lo-in mite phattuam na dingin a sem ahih na ki mu thei hi. Hi mopawi sungah a zenzen in Tonu leh Topa Jesu a om lo hi leh mopawi bawl te bangzah takin lung buai ding hiam? Ahi zongin Topa Jesu leh Tonu Maria hong pai citciat in, Tonu Maria in lenggahzu a bei lam a theih tak ciangin Topa Jesu kiangah vagen hi. Topa Jesu in ka hun cing naikei ci mah tase leh mihingte kisapna mu ahih manin, hehpihhuai sa ahih manin a Nu ii ngetna tungtawnin na lamdang hong bawl hi.
Hih na lamdang abawlna hangin mopawi bawl mo pa, mo nu hitaleh innteekte leh mitampi te in noptuamna ngah uh hi. Lungdampih uh hi. Topa Jesu in nalamdang abawl na in ama Pasian ahihna alahna bek thamlo in mite ii phattuam nading, mite ii lungkim nadingin abawl ahihna thu I mi hi.
Tuni Lungdamna Laisiangtho tungtawnin eite in Pasian in hong piak thupha, letsong tampi I ngah hi. Tua I ngahna te tungtawnin eite in bangzah ciangin midangte phattuam nading I bawl zo hiam? Midangte lungkim na dingin zangkhia I hiam cih I ki ngaihsut kik ding kisam hi. I zatvat zawh kei leh zong Tonu Maria bangin a kizatkhak theih na dingin a genkha te I hi zo hiam? Pasian tungah angetsak, Tonu Maria bangin palai semin gentheih haksatna atuak mite ahuhzo, angetsak thei te I hih ding leh thungetsak na tawh midangte ading thupha abawl zo te I hih zawh na dingin hanciam ni.