Homily By Rev. Fr. Joseph Zo Mung (Jan.13.2022, Thur)

Tuni Lungdamna Laisiangtho sungah Topa Jesu in itna tawh nalamdang asepngamna, thu ahilhna thu I thei hi.
Tuni Laisiangtho sunga phaknatna aneipa in bang cih leng damna ngah ding ka hi hiam cih ngaihsun in Topa Jesu kiangah pai ning ci-in ngaihsun hi. Tua hun laitakin phaknatna aneite mi tawh kipawl thei lo-in khuanawl ah a kikoih ahi hi. Ahi zongin hih phaknatna aneipa in damna ngah nuam ahih manin thukham palsatin Topa Jesu maiah kiniamkhiatna tawh khukdin “Topa aw, ut peuh lecin nong siangtho sak thei hi” ci hi. Topa Jesu in zong ka ut mah hi. Na siangtho in ci-in damna pia hi.
Hi mun I et ciangin hehpihhuaisa, it. Itna a om ciangin tua itna in thukhamte hong palsat sak hi. Leitungah itna a omloh ciangin buaina tam hi. Topa Jesu in itna tawh en ahih manin miphakpa na lawng ngamin damna na pia hi. Tua ahih manin itna a om na munah damsak om in, nopsakna om hi cih phawkni.
Eite in zong Pasian I up ciangin hi zo lo ding cih om nawnlo in, ahi zo lo pen hong hi sak hi. Tua ahih manin I nuntakna sungah hi zo lo ding I cih thu tampitak om a, tua te Pasian tungah ap in Topa aw, nang ut peuh leteh hong hi sak thei hi teh cih upna tawh pai lehang, Pasian in hehpihhuai hong sa in, itna tawh hong en ding hi. Amah in leitung mite mitmuhna tawh ahi theilo thu te hong hi thei sakin hong piang thei sak ding hi.
Tua ahih manin tuni Lungdamna Laisiangtho I sim kawmin eite nuntakna sungah hih miphakpa bangin upna muanna takpi tawh I pai a, kiniamkhiatna tawh I pai leh Pasian in hehpihna tawh hong en dinga, a khut hong zamin damna ngahin ci-in eite kisapna hong pia ding hi cih phawkin upna leh kiniamkhiatna tawh Topa Jesu kiangah pai ciatni.