Homily By Rev. Fr. Joseph Zo Mung (Jan.12.2022,Wed)

Mk 1: 21-39
Tuni Lungdamna Laisiangtho sungah Topa Jesu in Simon leh Andrew te inn ah a hawhna thu I mu hi. Tua bangin ahawh ciangin Simon ii sungnu damlo in a om na thu mite in Topa Jesu kiangah agen ciangin Topa Jesu in Simon sungnu khut lenin phongto in damna apiakna leh cina tampite damna apiakna, dawi veite sung pan dawi ahawlkhiat sakna thu te zong I mu hi.
Hih Lungdamna Laisiangtho in eite bang hong thei sak hiam? Tuni in Topa Jesu ii khutin cinate damsak nading, mite thupha piak nading, a cimawh mite an piak nading leh dawi hawlkhiatna cih bangin amah in hong zang hi. Topa Jesu in akhut tawh Simon sungnu lenin phongto a, tua panin Simon sungnu in damna ngah hi. Damna angah khit ciangin Simon sungnu in Topa Jesu leh apawlte zin do-in anvak hi.
Tua ahih manin I khut in bang hih nading hiam cih pen Topa Jesu a khut tawh damna apiak a, mite huhna in a zat mah bangin Simon sungnu in zong damna angah khit ciangin a khut tawh mite huh a, mite ading phattuamna na bawl in zin do na in na zang hi.
Eite khat ciat zong ki ngaihsun ni. I khut a dam hiam? I khe adam hiam? I khut te in mite huh na dingin Pasian in hong piak hi cih phawkni. I khut I khe te thupha bawlna in I zang hiam cih ki ngaihsun ni. Tua ahih manin tuni Topa Jesu in mite damna pia in, a damsak mite in zong ama nasep bangin a etteh ding ut hi cih phawkin eite in zong Topa Jesu ettehin I khut I khe te nahoih sepna in zangin Topa Jesu in damna apia takpi hi cih upna nei-in I khut I khe te zong mite ading phattuamna bawlna, thupha bawlna in I zat zawh nang han ciamni.