Homily By Rev. Fr. Joseph Zo Mung (Jan 6,2022, Thursday)

Lk 4 : 14 – 22
Tuni Lungdamna Laisiangtho sungah Topa Jesu hong khangkhiat khit ciangin Khasiangtho tawh kidim in ama khankhiatna ahi Nazareth khua ah Judah mite ngeina zui-in Pasian thu a tangko na thu I thei hi.
Amah in Judah mite ngeina zui-in Sabbath ni-in Biakinn ah pai-in Laisim dingin ki pan hi. Tua bangin akipat ciangin mite in amah bang pia hiam cih leh Kamsangpa Isaiah ii gelh, a kizial lai lom khat pia in amah in tua sim hi. Tua asim lai in bang hiam cih leh Topa Khasiangtho in kei tungah a om hi. Banghang hiam cih leh mizawngte kiangah lungdamna thu a tangko dingin amah in kei sathau hong nilh zo hi. A kiman a kikhum mite kiangah suahtakna a tangko ding ahi zongin, mittaw tein khua amuh kik theih na ding un ahi zongin, nenniamna a thuak mite khakkhiat nading ahi zongin Topa hehpihna kum a tangko dingin ahi zongin kei hong sawl hi ci-in a ki gelhna mun a sim hi. Tua lai asim khit ciangin amah in hih lungdamna pen tuni in note lak ah om hi, note sungah hong tangtung khin hi ci hi. Hih kamsangpa ii a tangko mipa in kei ka hi hi ci-in amah in tua munah hangsan takin hong tangko a, hi lungdamna thu a sem ding pa pen note lak ah om hi ci-in hong tangko hi.
Topa Jesu in hih lungdamna thu a tangko na ah Judah mi ahih manin Judah mite ngeina zui-in, angeina sungah Pasian tawh kipawl khawm theih nading khempeuh lamlak in tua tawh lungdamna thu tangko hi. Eite in zong minam ngeina ciat I nei a, tua pen Pasian in amah tawh kizop nading in hong piak zong ahi hi. Tua ahih manin hih I ngeina te tungtawn in Pasian I muh theih ding, Pasian I phat theih ding, Pasian tawh I kipawl theih ding kisam hi.
Hih lungdamna thu ei Zomite lakah hong tunga, eite in zong I zo ngeina te lamsangin, I zo ngeinate Pasian thu tawh siangtho sakin, Pasian tawh hong kikhen sakte paai in, Pasian tawh hong kinai sak semsem dingin I ngeina te I puahphat ding kisam a, I ngeinate tawh Pasian I phat ciangin I si sung, I sa sungah I upna te hong picing pan dinga, tuni hih lungdamna thu eite sungah hong tung hi cih phawk ding hi hang.
American ah I pai ciangin amaute in suahtakna angahna mun, suahtakna mualsung tungah bang ki-at hiam cih leh “Freedom is not free” ci hi. Suahtakna I cih in amawkna in a kingah hilo a, hanciamna tawh a kingah, thagui thatang tawh deihna tawh, itna lunggulhna tawh a kingah ahi hi ci hi. Tua ahih manin eite in suahtakna ahi, lungsim suahtakna, pumpi suahtakna I ngah na dingin Topa Jesu eite lakah hong om khin ahih manin I ngeinate kem cingin tua te tawh lungsim suakta in, I pumpi suakta in, I cidam in nuamsa in Pasian I phatzawh nang, suahtakna man, a kicing lungnopna, Khasiang hong piak nuntakna I ngahzawh nang hanciam ni.