Homily By Rev. Fr. Raphael Khup pi (Kum cinni (31.12.2021(Fri))

Jn 1: 1-18
Kumsialin kum hongcin tak ciangin khat leh khat Happy New Year ci-in ki notset hi hang. A lungdam huai kumthak, a lungnop huai kumthak, a nuamhuai kumthak ci-in ki notset hi hang. 2021 I lut lai-in Happy New Year ci-in a nuam kumthak hi ta hen ci-in khat leh khat I ki notset a, tua tawh kumthak lut-in kha khat khit kha khat kah toto in tuin December kha bei, kum thak atung ding hi ta hang. Jannuary kha panin December kha kikal ah bang thu teng piang a, bang thu teng tawh kituak a, haksatna ahi zongin, lungdamna ahi zongin, dahna kahna ahi zongin bang teng tawh ki tuak I hiam cih tuni in tawmno khat ngaihsut ding kisam hi.
Abeisa hun khempeuh pen Pasian khut sungah om ahih manin tuni in hi ciang a tung thei I hihna zong I phawk ding kisam hi. Tuni Lungdamna Laisiangtho sungah a kicing ama itna hangin eite khempeuh tungah thupha a banban in hong pia hi ci-in John in na gen hi. Abei sa hun sungin haksatna zong tampi tak om a, ahi zongin Pasian hehpihna tawh I phul zawh hun zong tampi tak om hi. I lungkiat hun zong tampi tak om a, ahi zongin Pasian hehpihna hangin tha la kik in I pukna pan I thawhkik hun zong tampitak om hi.
Tua te khempeuh I etkik tak ciangin Laisiangtho in bang hong phawk sak hiam? Thupha a banbanin, athuapthuap in hong tung veve hi cih pen ki mu thei hi. Tua ahih manin Topa tungah lungdamkoh logal bangmah om lo hi. Lungnopna kumthak ahi kei phial zongin Pasian in eite hong ompih veve hi. Hong taisan lo hi. Amah in eite ii bukna suangpi hi ci-in muangin, um leng, eite ii nisim kalsuan nate, mite’ muhna ah anuam ahih loh hang, I lungsim sungah lungnopna om veve hi cih tuni ei leh ei tha kipia in midangte zong tah a pia zo dingin hanciam ni.
Eite biak Pasian in eite tawh a omkhawm tawntung Pasian, hongtaisan ngeilo Pasian hi. Haksat hunin eite tawh om in, I dah I kap hunin eite hong hehnem in I khitui hong nul sak dingin amah I kiangah, I geiah, I sungah om tawntung hi cih phawkin Topa hong ompihna te phawkin Topa hong ompihna mite zong theisak in tua tungtawnin Topa tungah lungdam a ko zo tawntung te I hih theih na dingin tu a hong tungding kumthak sungah hanciam ni.