Homily By Rev. Fr. Joseph Zo Mung (Dec.30.2021, Thur)

Lk 2 : 36-40
Tuni Lungdamna Laisiangtho sungah Kamsang numei khat ahi, Anna in Topa Jesu amuh ciangin kangaklah gumpa honpa tu in muta ing ci-in lungdamin Pasian aphatna thu hong theisak hi.
Hih kamsang nu Anna in kum sagih sung pasal nei-in, a pasal asihkhit ciangin Biakinn ah ki-ap in sun leh zanin antangin thungen aa a om, Pasian na a sem, Topa Jesu hong pai takpi ding hi, Pasian a kamciam kei tungah hong tungsak takpi ding hi ci-in upna tawh teci apang kamsang nupi khat ahi hi. Amah in kum (86) aphak ciangin a thunget ngah panin Pasian kamciam ahi Topa Jesu mu thei pan hi.
Topa Jesu leitungah hong pai ciangin teci apang masate en dihni. Amah hong pai ding pen Vantungmi Gabriel in genin Tonu Maria in na thei masa hi. Hong pai ciangin tuu cing te’n va bia thei hi. Mipil thum ten bia thei hi. Biakinn ah Topa Jesu a ki-ap ciangin Semeon in zong mu-in lungdamin Pasian in a kamciam hong tangtung sak hi ci-in Pasian phat hi.
Tuni eite in I lungsim sungah upna I cih in bang tanvei ngak I hi hiam cih ki sittel dih ni. Hih meigong nupi nu in kum (86) a ngak ciangin Topa Jesu mukha pan hi. Eite in thu I nget ciangin tuni ngen in zing ciang I ngah thei nuam pah kha hi. Tuni singno suanin zing ciang a gah I lo thei nuam pah kha hi. Ahi zongin I ngah baih hun om a, I ngah hak hun om a, tua te sungah lungkia lo a I ngak ding hih Laisiangtho in hong theisak hi.
Adiakdiak in tuni ei ii dinmun ciat, Christian I suahna, upna picing I ngahna te pen I pi I pu, I nu I pa te ii nidanglai pak a thu angetna, amauten zong mukha nawnlo in ahi zongin tu in eite tungah hong tung zong hi thei ding a, tua te phawkin lungdam I koh theih ding zong kisam hi.
Eite in upna khaicite ngahkhin I hih manin, Mesiah sang thei khin I hih manin ama hong hilh thute I nuntakpih zawh nang I upna te ah nungkik lo-in Pasian in a kamciam pen ka nuntakna sungah hong tungsak ding hi. Amah tungah upna tawh thu I nget nak leh hong pia ding hi cih phawkin thungetna te picing tak a I neihzawh nang, thakhat thuin ngahpah taleng, ngahpah ta keileng, hih meigongnu ii thunget mah bangin lungduai tak a I ngetzawh tawntung nang hanciam ni.