Homily By Rev. Fr. Joseph Zo Mung (29. 12. 2021)

Lk 2 : 22-35
Tuni I sim Laisiangtho masa sungah John in “Pasian thukhamte zuihna in Pasian itna hi” cih, thukham zuihna in itna leh khantohna ahih na, thumangna ahihna leh thupha ngahna ahih na thu bulphuh in hong gen hi. Salan sungah “Vantung mite kipak henla, leitung mite lungdam hen” ci hi.
Vantung mite banghang in kipak ding hiam? Topa Jesu a suahna, Topa Jesu a phatna hangin kipak a, leitung mite I lungdamna pen Topa Jesu hong suahna, Topa Jesu I san theih manin I lungdam hi. Lungdamna Laisiangtho sungah Judah mite ngeina a dingin Moses in thukham a piak mah bangin nupi khat nau asuak ciangin a tacil pen Biakinn ah ap ding, vun atna nei ding, ki siansuahna nei ding, tua tapa cil pen Pasian hong piak thupha hi ci-in biakinn ah ap in lungdamko ding cih om hi.
Tua mah bangin Mary leh Joseph in zong amau ngeina mah bangin vakhu tawh atapa uh biakinn ah ap-in siansuah dingin va pai-in Simon kiangah va ap hi. Simon in Topa Jesu a tawikhak ciangin Pasian in kei tungah a kamciamna hong tung sak hi ci-in lungdamin Pasian phat hi. Tua khit ciangin naungek pen Pasian thupha tawh hong khangto in pumpi taksa, lungsim pilna theihna ngaihsut khempeuh ah hong khangto hi ci-in Laisiangtho sungah I thei hi.
Tuni hih Laisiangtho te sungah ka deihin Tonu Maria leh Misiangtho Joseph ii gamtatna hi. Amaute in hanciam in amau neih sun, amau hih zawhzah tawh Vakhu tawi-in a tapa uh Pasian kiangah ap ahih manun a tapa un Pasian thupha khantohna nei hi. Tua ahih manin tuni Pasian in bang hong deih hiam? Ama thu I zuih ding, I hanciam ding hong deih hi. Pasian thukham zuihna te ah a zawngte ading in baih lo a, a hau te adingin zong baih tuan lo hi. Ahi zongin abaihlo Pasian thukhamte mah I zuih ciangin thupha I ngah dinga, I bangkua sungah, I innkuan sungah, I tu I ta te tungah Pasian ii eite ading aa abanban a hong gelsak thupha te hong tung ding hi cih phawkni.