Homily By Rev. Fr. Joseph Zo Mung (Dec 22, 2021)

Lk 1 : 46 -56
Tu sunga I Laisiangtho simte in Topa Jesu hong suah nading thu te ahih manin Tonu Maria thu ki lim at phadiak hi. Adiakdiak in Lungdamna Laisiangtho a at te sung panin St. Luke in Tonu Maria thu nasia at phadiakin Tonu Maria ii hoihna phatna te Laisiangtho sungah I zon ciangin Misiangtho Luke ii at Laisiangtho sung pan tam kimu thei pen hi.
Zanni in zong tampi ki mu khinzo hi. Tuni in bang mu I hiam cih leh ‘Ka Kha in Topa phat hi’ ci hi. Amah in Khasiangtho tawh kidim ahih manin Topa aphatna thu Tonu Maria mahmah in na gen hi. “Kei hong hon pa Pasian sungah ka lungsim a kipak hi” ci hi. Amah in a honpa Pasian sungah lungnuam hi. Tonu Maria nuntakna en lehang atapa Topa Jesu hangin haksatna tampi thuak himah ta leh amah in Pasian Khasiangtho ngahin Pasian tungah kinga ahih manin a tawntung in lungnuam hi. Tonu Maria in kiniamkhiat mahmah ahih manin Pasian maipha angahna thu I mu hi. Tua ahih manin amah in “Mi akhang akhangin kei thupha ngah nu hong ci ding hi” ci ngam hi. Topa Jesu a um mi, a thei mi khempeuh in Tonu Maria ii kiniamkhiatna, thupha ngahnu ahihna a theihloh a phamawhna thu Tonu Maria in tel takin hong gen hi.
Tuni eite hong ompih, hong hehnem, a kiniamkhiat mite a it a lamsang Pa Pasian in eite thupha hong pia hi cih phawkin tua thupha I ngah semsem na dingin a tawntung in thungetna tawh Pasian tawh kizom in, kiniamkhiatna leh itna tawh Topa Jesu zongin ama hong suahna Bawngbuk sungah eite zong va pai-in mipil thumte ii biak mah bangin abia thei te, tuu cing ii abiak mah bangin a bia thei te ih hih zawh na dingin han ciamni.