Homily By Rev. Fr. Joseph Zo Mung (Dec, 20. 2021)

Lk 1: 26-38
Tuni Lungdamna Laisiangtho sungah Tonu Maria, Vantungmi in a hopihna thu ih thei hi. Vantungmi in Tonu Maria kiangah “Ave Maria aw, hehpihna tawh na kidim hi. Topa in nang tawh omkhawm a, numei khempeuh lakah nang thupha a ngah nu na hi hi” ci-in na hopih hi. Tua bangin Pasian ii a thupiakna, a vangliatna, Pasian in a teltuam ahih na thu agen khit ciangin nangin gaai-in tapa khat na nei ding hi ci-in gen hi.
Tua bangin Vantungmi in a gen ciangin Tonu in amah zuthawl a kipiasa ahih manin lamdang sa-in hih thu koi ci bangin piang thei ding hiam ci-in vantungmi adawng ciangin Khasiangtho in nang tungah na hong sem ding hi. Pasian ii deihna pen apiang thei lo om lo hi. Pasian in gel peuh leh apiang theilo omlo hi ci-in upna thu na pia hi. Pasian vangliatna tawh apiang theilo na omlo hi ci-in a gen ciangin Tonu Maria in tua hi leh na gen bangin kei tungah hong piang ta hen ci-in kiniamkhiat takin na sang hi.
Hih kammal ih et ciangin bang muthei ih hi hiam? Na gen bangin kei tungah piang ta hen cih ih et ciangin abaih ding tawh kibang hi. Ahi zongin tulaitak nungak khat pasal neilo in ta nei ding ci leh asang ngam ding hiam? Ahih kei leh Pasal nei dingin a kiciamsa khat adang khat tawh ta nei ding ci leh baih takin a sangngam ding hiam? Haksa mahmah ding hi. Ahi zongin Tonu Maria ii upna en lehang, apasal ding Joseph sangin Pasian kammal thupi sak zaw a, Pasian kammal nambat khat in koih ahih manin Topa aw, kei nang a hing, na sila nu hing, na gen bangin kei tungah piang ta hen ci-in Pasian kammal nasang hi.
Tuni in Tonu Maria ih etteh theih dingin amah pen Joseph tawh kingai mahmah hi. Zuthawl a kipia khin hi. Ahi zongin Pasian thu tawh angaihsut ciangin hi pen leitung thu tawh kiteen nading hi a, vantungmi hong hopihna pen Pasian thu ahih manin Pasian thu nambat (1) in koih hi cih ettehhuai mahmah hi. Eite zong thu ih khensat ding ciangin leitung thu leh Pasian thu namnih hong tonkhawm thei ding a, ahi zongin Pasian hang tawh leitung thu pen ih pelhzawh ding athupi hi.