Homily By Rev. Fr. Raphael Khuppi (Dec.18.2021)

Mt 1 : 18-24
Tuni Lungdamna Laisiangtho pen Mt Mt 1 : 18-24 sung hi a, Messiah gumpa Naungek Jesu koi ci bangin hong suak ding hiam cih thu ahi hi. Eite’n ih theih s amah bangin hong suak ding Naungek pen Pasian Tapa ahih mah bangin Pasian taktak hi a, Pasian ahihna cindawn cia zong hem lo hi. Tua mah bangin Mihing suahna hong la ahih manin, mihing ahihna zong bit sinsen hi. Ei mihingte mah bang linlian in Nu nei-in Pa zong nei hi. Ahi zongin anu pen Khasiangtho in a gaisak ahih manin apa pen amah tawh sisan kizopna lian omlo-in amah a kempa hong suak hi. Mihing lam pan ngaihsun leng apiang theilo thu khat hi napi-in Pasian aa dingin apiang theilo na khat beek omlo hi.
Hih thu pen tuni ih sim Lungdamna Laisiangtho sungah kimu thei hi. A nu ding ahi, Maria pen Joseph aa dingin zuthawl kipia hi. Zuthawl kipia cih pen a kiteng hi nailo a, a kikham khol bek hi pan hi. Ahi zongin a lamdang thu in bang hiam cih leh, zuthawl kipia hi pan napi, Maria in nau hong paai mawk hi. Hih thu pen Joseph in a theih tak ciangin ngaihsut hamsa sa mahmah hi. A lungmang mahmah hi. Kei amah tawh omkhawm nai kilkel lo, bang hang aman naupaai thei. Leitung lungsim tawh ngaihsun leng a lawmnu, a zi ding nu pen ama tungah citak lo-in midang tawh angkawm hi kici thei pah lian hi. Joseph zong mihing ahihna tawh hih bang lian mahin ngaihsun hi. Tua bek thamlo-in Joseph pen thuman thutak tawh nungta-in thuman thutak a deih pa ahih mah bangin hih thu pen athu ala telcianlo pi-in sang zo pak hetlo hi. Tua ahih manin maak sim asawm ahi hi.
Ahi zongin vantungmi hong pai in, Joseph aw, lunghimawh kei-in, hih na lawmnu Maria ii gaaina pen kua mah dang tawh hilo hi, Khasiangtho vangliatna tawh amah a gaaisak hi zaw hi, ci-in a va gen ciangin, aw hih pen Vanglian Pasian ii a lamdang nasepna ahimawk ve maw, cih hong thei ahih manin Maria pen maak sawm nawnlo hi. Hih mun ah Joseph pen a lungnem mahmah, a thumang mahmah leh a picing mahmah Pasal hoih khat ahih na hong kilang hi. Hehna ding thu ah hehpah phenphan selo-in a thupiang teng khinkhai siam hi. Tua banah ama leitung lungsim ngaihsutna sangin, vantungmi gen thu, Pasian deihna masak zaw hi. Pasian in ama tungtawnin bang nasem nuam hiam cih lungngai-in, Khasiangtho ki makaih sak hi.
Tua mah bangin Maria zong, ama tung a thupiang khempeuh Pasian deihna ahih lam tel mahmah ahih manin lungduai takin ahun ngak hi, apiang bangbang tungah lungkim hi. Vantungmi in nau napaai ding hi acih ciangin, Joseph in amah bang ci muh ding cih pen tel mahmah ding hi. Ahi zongin Pasian thu, Pasian deihna ahih nak leh san ngamlah dingin ngaihsun lo hi. Sang ngam hi, thuak ngam hi, hamsa ding cih thei napi’n phul ngam hi. Tua ahih manin Maria leh Joseph te anih tuak un Pasian deihna a tangtung sak, Messiah hong piankhiak nading Innkuan, Innkuan siangtho hong suak uh hi cih, tuni Lungdamna Laisiangtho tungtawnin ih thei thei hi.
Hih thu hangin zong, ei Catholic pawlpi in Innkuan siangtho te ci-in pahtawina min lian a kipia ahi hi. A mawk cih hilet lo hi hang, Siangtho takpi uh hi. Khat leh khat kithei siam uh hi, khat leh khat kimuang uh hi. Khat le khat mawh ki zong lo-in mawh kimaisak uh hi. Tua ahih manin ute naute, Messiah gumpa hong pai nading lampi ih sialna ah, eite zong Joseph leh Maria tem ah bangin lungsim hoih lungsimpha a vom zo den te ih suah na ding thungenin hanciam tawntung ni.