Homily By Rev. Fr. John Pau Sian ( Dec 16, 2021)

Lk 7 : 24-30
Tuni Lungdamna Laisiangtho sungah John ii nasepna te, palai asepna te ki mu hi. John in Topa Jesu hong pai na dingin lampi sial aa, mite tungah kisikkikna thu gen aa, mi tampi in amawhna te kisikin amah kiangah pai-in tuisawpna nasang uh hi. Laisiangtho sungah John pen anunung pen kamsangpa hi a, kamsang cih ciangin Pasian leh mihing kikal aa, Pasian thu, Pasian kammalte a puak ahi hi.
Banghang in Pasian kamsangte zang ahi hiam cih leh Pasian in ama kammalte mite a zaksak nop ciangin kamsangte tel a, tua kamsangte tungtawn in ama kammalte mite tungah gen hi. Pasian in kamsangte zangin ama kammal te mite tungah a gen ciangin tua kamsangte thugen nate, khat veivei ciang mite in nasang lo-in thatin na do kik uh hi. Tua bangin Israel minamte in kamsangte thu a san loh manin kum (70) sung, amau gamah om thei lo-in Sal in na om uh hi. Tua bangin Israel te in kamsangte thu amang loh manun kum (400) sung kamsang nei lo-in na om uh hi.
Topa Jesu in Pasian ahi, ‘Kammal’ te mite tungah apuak dingin, teci a pang dingin eite hong zawn hi. Eite in hi kammalte ih zak tak ciang, Israel minamte bangin sang lo-in om lehang, hi kammalte eite adingin manphatna omlo ding hi. Ahih hangin tuiphumpa John bangin kiniamkhiat in ‘kei pen kammal ii aw ka hi hi’ a cih mah bangin Pasian ii aw te, Pasian ii kammalte eite in teci pang a, ei ii kam sungpan a pusuak kammal te in mite muhdahna kammal hi lo a, mite lungsim a nuamsak, mite nop laitakin a nuam khawm, mite dah laitakin a dah khawm kammalte hi a, hazatna tawh asuak kammalte hilo a, mite aphat thei, mite ahehnem thei kammalte a suahzawh na dingin eite in hanciam ciatni.
Topa Jesu in Mittawte khuamusak a, Khebaaite lampai sak a, Bilngongte khuaza sak a, asisate nangawn tho kik sak hi cih lungdamna thu hong puak ahih mah bangin eite nuntakna, eite lungsim, eite kammal te in mite tungah lungdamna thu apuak thei nuntakna tawh ih kalsuan zawh na dingin hanciam ciatni.