Homily By Rev. Fr. Maximian Mungpi ( Dec 14, 2021)

Mt 21 : 28 – 32
Tuni Lungdamna Laisiangtho sungah Topa Jesu in tapa nihte thu gentehna hong nei hi. Tua tapa nihte sungpan amasa pa kiangah a Pa pai-in ka ta aw, lenggah huanah va kuanin ci-in gen hi. Tua tapa masa pa in kuan keining ci-in gen napi’n a Pa paikhiat khit ciangin kisikkik in a vakuan tapa ahi hi. Tua ciangin a Pa atapa nihna kiang pai leuleu in ka ta aw, tuni lenggah huanah vakuanin ci-in asawl ciangin tua tapa nihna pa in Pa aw kuan mah ning ci na pi’n a Pa paikhiat khit ciangin kuanlo in om hithiat hi.
Topa Jesu in ama thugen angai te kiangah hitenih pan kua-in a Pa deihna azui zaw hiam ci-in a dot ciangin mipite in a tapa masa pa in a Pa deihna a zui hi ci-in gen uh hi. Tua ciangin Topa in note kiangah dikna lampi hong lak dingin tuiphumpa Johan hong pai ciangin note in na sang kei uh hi. Ama thugente bangin na gamta kei uh hi. Ahih hangin Tuiphumpa John in dikna lampi hong lakna tungtawn in siahdongte leh mipaktatte in ama thu mangin kikhel uh hi. Note in ahih leh hi thu te na muh hangun na lungsim uh kikhel lo-in amah na um kei uh hi ci-in Topa Jesu in gen hi.
Tuni tapa nihte thu gentehna ih muh mah bangin eite in zong ih Christian nuntakna sungah kampi bek tawh Pasian aw, Topa aw hong muang ing ih cih hang, ih nuntakna sungah Topa deihna bangin ih gamtat kei leh tapa nihna tawh kibang kha thei ding hi hang.
Adventu nipi kaal thumna hong tungta ahih manin eite in abeisa kum sunga ih gamtat ngeinate, ahoihlo te a om leh nusia in, kisikkik in hong pai ding Topa Jesu pen pawibawlna, nek leh dawnna te tawh bek hi lo-in, ih nisim nuntakna sungah Topa Jesu hong suahzawh nangin eite in Johan ii hong gen dikna lampi, eite’n ki puahpha in, ih mawhnate kisikkikna nei-in, mite maiah zong Pasian hoihna phatna te alak zo te ih suah zawh nang ih hanciam ding kisam hi.