Homily By Rev. Fr. Joseph Zo Mung (Dec 13, 2021)

Mt 21 : 23 – 27
Tuni Lungdamna Laisiangtho sung ih et tak ciangin thuman thutak thei napi a zuilote gamtatna ih mu hi. Topa Jesu in biakinnpi sungah pai-in thu hilhna aneih ciangin tua laitak a, Pharisee te leh Laisiangtho siamte in kua thu tawh nabawl hiam ci-in na dong hi.
Tua ciangin Topa Jesu in zong dong kikin John ii tuisawpna piakna pen vantung pan hong pai hiam, mite tung pan hong pai hiam ci-in adot ciangin amaute in dawng thei nawnlo uh hi. Vantung pan hong pai ahih lam thei hi mah ta leh amau zui lo ahih man un, vantung pan hong pai hi cileng bang hangin no zui lo na hi uh hiam hong ci ding hi. Tua khit teh mihingte kiang pan hong pai hi cileng mitampi te in vantung pan hong pai ahih lam um ahih man in ei hong mawh sak ding hi ci-in lau ahih manin dawng thei nawnlo. Amaute in a upna, atheihna leh agamtatna uh kituak lo ahih manin buai-in dawng thei nawnlo uh hi. Tua bangin acih nading uh a theih nawnloh uh ciangin kote in ka thei kei uh hi ci-in dawng uh hi.
Topa Jesu in ken zong ka thei kei hi na ci peuhmah lo-in note in kong dot hong dawnglo na hih manun ken zong kong dawng kei ding hi ci hi. Topa Jesu in dawng lo bekin a thei lo hi peuhlo hi. Hi Laisiangtho in eite bang hong thei sak nuam hiam cih leh ih upna, ih theihna te ih zuih leh ih zuih loh in ih kampau ding hong khaktan hi. Pharisee te, Laisiangtho siamte in Topa Jesu ii thugen te a man lam thei napi in zui lo ahih manin amaute in thangsiahna dawngthei lo-in theikeng ci-in acgif;a&Smif hi. Leitung adingin tua bang a kingah hangin Vantung adingin kingah lo hi. Amaute in a upna bangin teci pang ngamlo, atheihna bangin Pasian kiang pan hong pai hi ci ngamlo ahih manin ka thei kei uh hi ci hi.
Tua ahih manin eite khat ciat ih kisit tel ding ah ih theih pipi ka thei kei hi ih ci kha hiam. Tua ahih kei leh ih upna, ih theihna bangin zui takpi ih hih manin um mah ing, man mah ing, zui mah ing ci-in teci a pang ngam te ih hi hiam cih ngaihsun ni. Tua ahih manin eite khat ciat in Topa Jesu ih upna, ih theihna bangin gamta in teci apang ding, amah tawh anungta khawm ding, amah tawh a si khawm ding, amah tawh a tho kik khawm ding hi hang cih phawkin eite in thuman thutak tawh ih nuntak zawh na ding hanciam ni.