Homily By Rev. Fr. Dominic Langh (Dec 12, 2021)

Lk 3: 10-18
Tuni Laisiangtho nihna sungah Misiangtho Paul in Philippi mite kiangah agen in ah “Lam etna sungah a tawntungin na lungdam un” ci-in a thuhilhna hita leh Laisiangtho masa sungah kamsangpa in Isarel mite kiangah lungdamna thu atangko nate tuni in a thangah huai mahmah ih mu hi.
Tuni Laisiangtho sungah siahdongte leh galkapte in a tavuan ciat uh semin duhhop huaihamna omlo in thumanlo pi-in zawhthawh thu tawh na asep loh ding, nasepna ciat ah thuman leh midik gamtatna tawh asep dingin a hilh mah bangin eite mimal khat ciat, ih Christian nuntakna picing taka a nungta dingin ong deih hi. Misiangtho Francis De Sale in “nang hong kisuanna munmun ah paakin gah hoih gah sawmin” a cih ciangin ih om na mun peuhpeuh ah Pasian teci pangin Christian gahhoih gahpha a gah te ih hih ding hong hilh hi. Lk 3 : 13 sungah zong amau ngahnopna sanga avalzaw huaiham a lak loh ding hong hilh hi.
Tuni ih Laisiangtho te ih et tak ciangin kisikkikna tawh Topa zuanin, ih nuntakna thaksuah sak ding, itna nasepna te sem ding, mite tungah tuiphumpa John mah bangin Topa hong pai ding atangko te ih suah nading leh eite in khat leh khat itna leh kikep siamna tawh Christmas angak te, a dawnte ih suah na dingin tuni Laisiangtho sung pan tha la ni.
Misiangtho Mother Theresa in “Itna tawh ih sepnak aleh na neu no khat nangawn in manpha mahmah hi. Tua ahih manin na ih sep peuhpeuh agolpi, alianpi, athupi athupilo hitaleh itna tawh sem ni” acih mah bangin ih Topa ih itna te ih Christian nuntakna ah anuntakpih zo a, midangte in lungnopna angah na dingin a huh zo te ih suahzawh na dingin mimal khat ciat ih biak Pasian in thupha hong pia ta hen.